Вакцина этивге тергев

Сыйлы къонакълар ва генгешни ортакъчылары булан саламлашгъан сонг, Къарабудагъегент район администрацияны башчысы Магьмут Амиралиев бугюн-буссагьат пачалыкъ­ны оьлчевюнде лап да агьамиятлы масъала – коронавирус аврувну алдын алмакъ учун вакцина этмеге тарыкълыгъы экенлигин айтды.

Демек, районну гьакимбашыны сёзлерине гёре, районну ичиндеги бары да къурумланы ва идараланы къуллукъчулары вакцина этдирген ва шо иш бугюнлерде де давам этилип тура. Олай да, М.Амиралиев оьзюню сёйлевюнде минглер булан районлулар хоншу шагьарларда ва районларда, гьатта республикадан тыш янда ишлейгенин эсгерди. Айтагъаным, шолар да коронавирус аврувгъа къаршы вакцина этдиргенин ва шо сиягьгъа гирмеге тарыкълыгъын ташдырды.

Оьтгерилген генгешни барышында ДР-ни Башчысыны Баш территориал округундагъы толу вакили Абидин Къарчыгъаев, республика инфекция больницаны баш врачыны орунбасары Рита Омариева ва Роспотребнадзорну Каспийск ва Къарабудагъгент райондагъы территориал бёлюгюню борчларын кютеген Тамила Ражапханова бизин районда коронавирус аврувну яйылывуну ва шогъар къаршы вакцина этивню гьакъында генг кюйде баянлыкълар бердилер.

Олар эсгерген кюйде, гертилей де, районну ичиндеги бары да къурумланы ва идараланы къуллукъчулары вакцина этивде гьаракатчы кюйде ортакъчылыгъын болдургъан. Шо якъдан бизин районубуз республиканы ичинде ал сыдырада токътагъан деп айтмагъа ярай.

Болса да, оьмюр чагъы уллуланы ва узакълашгъан (хронический) авруву бар адамланы арасында вакцина этдирегенлер осал экенлиги ачыкъ болду. Озокъда, докътурлар вакцина этмеге гери ура буса, шону бирдокъ да этдирмеге ярамайгъанын олар англатды.

Амма юреги авруйгъанлар, шекер авруву, тыныш алыв ва тамакъ аврувлары барлар вакцинаны этдирмесе, оланы авруву оьрчюкмеге ва къаркъарасына зарал болмагъа болагъанын ачыкъ этдилер.

Олай да, вакцина этивню гьакъында федерал ва республика даражаларда къабул этилген Роспотребнадзорну ва тергев болдурагъан оьзге къурумланы хас документлери булан генгешни ортакъчыларын ювукъдан таныш этдилер.

Генгешни ахырында районну башчысы Магьмут Амиралиев бирдагъы керен районну ичиндеги бары да къурумланы ва идараланы ёлбашчыларын, юртланы башчыларын, юрт Жыйынланы депутатларын, абурлу адамланы ва жаваплы къуллукъчуланы жамиятны арасында англатыв иш юрютмеге чакъырды.

Демек, М.Амиралиев олагъа ­халкъ булан туврадан-тувра ёлукъмагъа ва коронавирус аврувну заралы гьакъда айтмагъа таклиф этди. Сонг да,ол район администрацияны янындан вакцина этген 60 йылдан оьмюр чагъы уллулагъа ашамлыкъ продукталар булан кёмек этилмеге башлагъанын англатды.

Сентябр айны ортасына районну ичинде вакцина этгенлени санаву 6 минг адамдан артгъан. Коллектив иммунитет болдурмакъ учун шо санавну 35 мингге чыгъармагъа ­тарыкъ.

Районубузну гьюрметли ватандашлары, пенсионерлер, коронавирус инфекция аврувну къоркъунч­лугъу тайып битмеген. Касбучулар (докътурлар) айтагъан, англатагъан кюйде, аврувну яйылывуну алдын вакцина этдирив булан алма бола дейлер. Гьар адам савлугъуну гьайын этме, айлана якъдагъы дос-къардашларын къоруп сакъламакъ учун вакцина этдирсегиз юрегигиз парахат болур.