Партияны гезикли Съезди узатыла

Оьтгерилген Съездни ишинде, гьаманда йимик, РФ-ни Президенти Владимир Путин де оьзюню ортакъчылыгъын болдурду. Съездни ача туруп, партияны ёлбашчысы Дмитрий Медведев «Бирлешген Россия» партияны къабул этмеге гёз алгъа тутулгъан хас программасына бары да ватандашлардан гелген таклифлер ва тилевлер къабул этилгенин айтды. Масала, ватандашлардан гелген 2 миллион таклифни 1 миллион 500 минг – халкъны яшавун ва турушун яхшылашдырмакъ учун берилген таклифлер. Демек, Д.Медведевни баянлыкъларына гёре, «Бирлешген Россия» деген партиягъа халкъ булан тыгъыс байлавлукълар тутмагъа энниден сонг да имканлы болажакъ.

Съездни экинчи бёлюгюнде ортакъчылыкъ этегенлени арасында, озокъда, партияны генсоветини секретары Андрей Турчак, Оьр советини ёлбашчысы Борис Грызлов, РФ-ни якълав министри Сергей Шойгу, Коммунарканы баш врачы Денис Проценко, РФ-ни Президентини янында яшланы ихтиярларын якълайгъан толу вакили Анна Кузнецова, «Сириус» деген билим берив центрны ёлбашчысы, ОНФ-ни Баш штабыны сопредседатели Елена Шмелёва, «Бирлешген Россия» деген партияны Пачалыкъ Думадагъы фракциясыны ёлбашчылары, РФ-ни Гьукуматыны уьюрлери, РФ-ни регионларыны башчылары ва РФ-ни Федерациясыны Советини вакиллери бар эди.

Партияны Съездини алдында РФ-ни Президенти Владимир Путин ону якъчылары булан ёлугъув оьтгерди ва шо ёлугъувну барышында халкъны яшав гьалын ва турушун яхшылашдырмакъ учун этилмеге гёз алгъа тутулгъан ишлени гьакъында эсгерди.

Масала, Россияны ичиндеги бары да пенсионерлеге сентябр айда кёмек гьисапда 10 минг манат акъча бермеге таклиф этди ва шо гьакъдагъы хас указына къол салды. Олай да, асгер къуллукъчулагъа да 15 минг манат кёмек гьисапда акъча берилмеге гёз алгъа тутула. Август айны баш гюнлеринде школагъа охумагъа барагъан бары да яшланы ата-анасына 10 минг манат акъчалар берилди. Демек, булар барысы да – халкъны бугюн-буссагьатгъы социал ва материал гьалын яхшылашдырмакъ учун гёрюлген чаралар.

Олай да, РФ-ни Президенти оьзюню сёйлевюнде инфраструктураны янгыртмакъ ва яхшылашдырмакъ учун федерал бюджетден хыйлы харжлар гёрсетмеге таклиф эте туруп, яшавлукъ уьйлери бузукъ (аварийное жильё) ватандашланы шартларын яхшылашдырмакъ учун ­янгыз бу йыл шо программагъа 50 миллиард манат акъча къошмагъа тапшурду.

Ватандашланы бары да якъдан якъламакъ учун чаралар гёрмекни эсгере туруп, Владимир Путин Афгъанистан ва шолай къалмагъаллы уьлкелерден бизин ватандашларыбызны оьз­ элине къай­тармагъа тапшургъан сонг, Дагъыстан ва Мычыгъыш республикаланы ватандашлары 20 йыллар алда халкъара бандит ва террорчулукъ уьюрлерине къаршылыкъ билдирмеген буса, шо оьрде эсгерилген уьлкелердеги къувунлу гьал бизде де болмагъа имканлы болгъанын айтды.

Оьзюню сёйлевюню ахырында РФ-ни Президенти Владимир Путин айрокъда социал-экономика ва яшавлукъ-туруш масъалалагъа «Бирлешген Россия» деген партияны депутатлары сентябр айда сайланажакъ янгы Пачалыкъ Думада агьамият бермеге тарыкълыгъын ­ташдырды.