Меню
16+

Сетевое издание «Будни района»

20.08.2021 09:34 Пятница
Категории (2):
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Вакцина этивню айланасында

Автор: Багьавутдин Самадов

Бугюнлерде савлай дюньяда ва элибизде йимик, бизин республикабызда да ва районубузда да коронавирус аврувгъа къаршы вакцина этив оьтгерилип тура. Врачлар береген баянлыкълагъа гёре, 2020-нчы йылда коронавирусдан авругъан адамлар енгил авруй эди буса, бу йыл язбаш ва яй вакътилерде авруйгъанланы гьатта яртысы авур кюйде авруй. Шоллукъда, коронавирус аврувну яйылывуну алдын алмакъ учун 18 йылдан оьмюр чагъы уллуланы 60 проценти сама вакцина этдирмеге тарыкъ деп, токъташдыра врачлар.

Къарабудагъгент районну гьакимбашы Магьмут Амиралиев алдагъы гюнлерде Къарабудагъгент район больницаны баш врачы Расул Гьиравов булан больницаны «къызыл зонасында» болгъан ва коронавирус аврувдан авруйгъанлар булан ёлукъгъан.

Шо ёлугъувда ачыкъ болгъан кюйде, авруйгъанлар бир-бир себеплеге ва оьзлени айсенилик янашывуна гёре, шо аврувгъа къаршы вакцинаны этдирмеген. Олай да, авругъанланы бирлери интернет байлавлукъда яйылып турагъан къалп ва ялгъан пикрулагъа инангъан болгъан.

«Аллагь буюрса, шу аврувдан къолай болуп больницадан чыкъсам, врачларыбызны таклифине гёре, коронавирус аврувгъа къаршы вакцина этдирежекмен. Олай да, агьлюмдегилеге, дос-къардашыма ва оьзгелеге де вакцина этдирмекни гьакъында англатажакъман. Сонг да, больницаны бары да медицина къуллукъчуларына, аврувланы гьайын этегени саялы, разилигимни билдиремен», — деп хабарлай больницада ятгъан аврувланы бириси.

Районну башчысы М.Амиралиев «къызыл зонадагъы» вакътисинде авруйгъанлагъа вакцина этмеге ва савлугъуну гьайында турмагъа чакъырды.

Оьтген арбагюн, 18-нчи августда, районну гьакимбашы Магьмут Амиралиев юртланы башчылары булан оьтгерилген ёлугъувда вакцина этивню гьакъында лакъыр этдилер.

М.Амиралиевни сёзлерине гёре, коронавирус аврувну яйылыву ва шогъар къаршы вакцина этив бугюн-буссагьат лап да аслу масъала болуп токътай. Шо саялы, юртланы башчылары шо ишге белсенип къуршалмагъа ва оьзгелени къуршамагъа борчлу.

Ёлугъувну барышында районну гьакимбашы бугюнлерде савлай районда 5200-ден къолай адам вакцина этдиргенни ачыкълашдыргъан сонг, аврувну яйылывун токътатмакъ учун савлай районну халкъыны 60 проценти коронавирусгъа къаршы укол этдирмеге тарыкълыгъын англатгъан.

Юртланы башчылары ёлугуъвну ахырында вакцина этив ва оьзге чараланы гючлендирмек ва чалтлашдырмакъ учун гьаракат этежегин ташдырдылар.

Хамисгюн, 19-нчу августда, район администрацияны жыйынлар оьтгерилеген уллу залында районну башчысы Магьмут Амиралиев районну ичиндеги юртланы имамлары булан ёлугъув оьтгерди. Шо ёлугъувда да жамиятны вакцина этивге къуршамакъ гьакъда айтылды.

Къарабудагъгент ЦРБ-ни баш врачы Расул Гьиравовну маълуматларына гёре, авруйгъанланы авадан кёп яны авур кюйде авруй. Олагъа таза гьава (кислород) етишмей. Шону алмакъ учун республикабыздан тыш янлагъа заказ бериле. Аврувну алдын алмакъ учун вакцина этмеге тарыкълыгъын Р.Гьиравов бирдагъы керен ташдырды.

Муфтиятны райондагъы вакили Каримулла Шигьмуратов оьзюню сёйлевюнде алимлер ва имамлар аврувгъа бакъгъан якъда врачлагъа инанмагъа ва оланы таклифлерин къабул этмеге тарыкълыгъын ачыкъ этди. Ол оьзюню сёйлевюнде республиканы муфтияты шолай ёл тутгъанын аян этди.

Ёлугъувда гьасил чыгъарып сёйлеген районну гьакимбашы Магьмут Амиралиев юртланы имамларына, юртну башчыларына ва врачлагъа шу аврувну алдын алывда кёмеклешмеге чакъыра туруп, халкъгъа вакцина этмекни гьакъында оьзлени пикруларын айтмакъны тиледи.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

5