Чаралар гёрюле

Шоллукъда, оьрде эсге­рилген къувунлу гьалгъа гёре, август айны 5-нде Къакъашура юрт администрацияны бинасында «Къарабудагъгент район» муниципал районну санитар ва эпидемия гьалгъа къарайгъан хас комиссиясыны гезиксиз генгеши оьтгерилди. Шо генгешге районну башчысы Магьмут Амиралиев оьзю ёлбашчылыгъын болдурду.

Олай да, генгешни барышында Роспотребнадзорну ДР-деги Управлениесини ёлбашчысы Николай Павлов, Къакъашура юрт администрацияны башчысы Уллубий Билалов, Къарабудагъгент район больницаны баш врачы Расул Гьиравов, Россияны МВД-сини Къарабудагъгент райондагъы ёлбашчысыны орунбасары Руслан Халдузов, Къарабудагъгент район ветеринар управлениени ёлбашчысы Исмайыл Гьажиев, Роспотребнадзорну Каспийск шагьаргъа ва Къарабудагъгент районгъа жаваплы территория бёлюгюню ёлбашчысы Омар Абачараев, районну юрт хозяйство управлениесини ёлбашчысыны орунбасары Закир Нухов ва оьзге жаваплы къуллукъчулар ортакъчылыкъ этдилер.

Шо генгешни барышында ону ортакъчылары юртда «сибирская язва» аврувну алдын алмакъ учун гёрюлмеге герекли алгъасавлу чараланы гьакъында айтдылар.

Демек, аврувну алдын алмакъ учун гьар абзаргъа гирип, шо гьакъда англатыв иш юрюлмеге тапшурулгъан. Олай да, шо аврув табылгъан уллу мююзлю гьайванны териси яллатып тайдырылгъан. Юртгъа гиреген ва чыгъагъан ерлеге уллу ва увакъ мююзлю гьайванланы тергевюн болдурмакъ учун хас постлар салынгъан. Сонг да, гиреген ва чыгъагъан машинлени дезинфекция этмек учун хас пост къурулгъан.

Хас комиссияны генгеши дагъы да районну ветеринар къуллугъуна уллу ва увакъ мююзлю гьайванлагъа вакцина этмеге тапшурув этди. Къакъашура юртну башчысына 200 гектар отлавлукълагъа, гьайван-мал сакъланагъан хас ерлеге мекенли кюйде дезинфекция этмеге буйрукъ берилди.

Оьрде эсгерилген тапшурувланы ва буйрукъланы яшавгъа чыгъармакъ муратда Къарабудагъгент районну гьакимбашы Магьмут Амиралиевни къабул этилген хас къарары бар.