Меню
16+

Сетевое издание «Будни района»

02.07.2021 08:59 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Вакцина этдирмеге чакъырды

Автор: Нюрсагьадат Изамутдинова

Къарабудагъгент районну башчысы Магьмут Амиралиевни районну ватандашларын дюньяны елеген коронавирус инфекциягъа къаршы вакцина этивге къуршамакъ муратда районну юртларында оьтгерилеген ёлугъувлары узатыла. Демек, Магьмут Амиралиев район администрацияны башчысыны орунбасары Жалалутдин Жамалутдинов ва район ЦРБ-ни баш врачы Расул Гьиравов булан бирче районну Къакъашура, Къакъамахи, Аччысув, Уллубийавул юртларына баргъан.

Ёлугъувланы барышында районну башчысы бизин районда бугюнгю эпидемиология гьалны гьакъында айтгъан.

Коронавирус аврувну алдын алмакъ учун вакцина инг биринчи ­оьтгерилмеге герекли чара экенни эсгере туруп, ол юртларда ватандашланы вакцина этдиривю бек осал юрюлегени гьакъда айтгъан. Олай да, аврувгъа къаршы турмакъ учун, ватандашланы 60-70 проценти вакцина этдирмеге герегин, юртларда буса 5 проценти тюгюл эсе этдирмегенин англатгъан.

«Эсигизде бардыр, гетген йыл нечакъы адам авур къайдада авруду, нечесе адам яшавдан гетди. Оьлгенлени жувма, гёмме адамлар ёкъ эди. Бары да халкъ маскалар гие эди, къыргъа тюкенге, аптекге тюгюл эсе, бирев де чыкъмай эди. Бирев-биревге гирмей-чыкъмай, юртдан-юртгъа бармай, нечик буса да, шо балагьдан къутулма бажарылгъан эди. Кёп адам авруду, шо аврув гелмеген, бирев сама да аврумагъан агьлю къалмагъандыр…

О заман бары халкъ дарман къаравуллай эди. Гьали буса аврувгъа къаршы вакцина чыкъгъанда, адамлар вакцинагъа инанмагъа сюймей.

Бизин вакцина инг де эффектли ва пайдалы деп гьисаплана. Шо саялы да бизин вакцинаны алмакъ учун кёп уьлкелер гезикге тургъан, заказ этген. Озокъда, вакцинабызны бир-бир пачалыкълар къабул этмейгени гьакъда да билдириле. Тек, шо – сиясат масъала. Биз буса докторларыбызгъа инанмагъа тарыкъ­быз. Бизин докторларыбыз уьлгю гьисапда инг биринчилерден болуп оьзлеге вакцина этдирди. Бизин де, къалгъанланы да вакцина этдирмеге чакъырды. Мен оьзюм де, ата-анам да, уллу къызым да барып вакцина этдирдик. Яман болгъан буса, мен агьлюмдегилеге де этдирмеге къоймас эдим.

Этдиргенлеге сорап къарагъыз. Олар вакцинадан сонг оьзлеге бир къыйынлыкъ да болмагъаны гьакъда сизге айтар.

Бираз иссилиги гётерилсе, къолу авуртса тюгюл, дагъы авурлукъ биревге де болмагъан.

Шо саялы да, мен сизин барыгъызны да вакцина этдирмеге чакъыраман», — деген Магьмут Амиралиев.

Ёлугъувланы барышында районну башчысы вакцина этдирме сюегенлени сиягьын этме, шолагъа гёре вакцинаны дозасын гьазирлемеге жаваплылагъа тапшургъан.

Олай да, гьар юртда ёлугъувланы барышында жамиятны гьар тюрлю масъалалары да арагъа салынып ойлашылгъан.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

3