Вакцина этивге аслу тергев

Генгешни ача туруп, ону юрютген районну гьакимбашы Магьмут Амиралиев коронавирус аврув булангъы районну ичиндеги бугюнгю гьалны гьакъында айтды. Демек, авруйгъанланы санаву гюн сайын арта ва гьал авур бола. Шо саялы да, аврувну алдын алмакъ ва токътатмакъ учун районну халкъыны 60 процентине сентябр айны 1-и болгъунча вакцина этдирмеге герек.

Олай да, районну башчысы М.Амиралиев оьзюню сёйлевюнде районну ичиндеги юртлар вакцинаны бек осал даражада этдиргенин ачыкълашдырды. Янгыз Къарабудагъгент юртну халкъыны 15 проценти вакцинаны этдирген. Къалгъан юртларда буса – 2-3 процент де ёкъ.

Ондан сонг трибунагъа Роспотребнадзорну Къарабудагъгент районгъа къарайгъан территориал бёлюгюню ёлбашчысы Омар Абачараев ва Къарабудагъгент район больницаны баш врачы Расул Гьиравов гётерилдилер ва коронавирус аврувну гьалы гьакъда мекенли кюйде маълуматлар бердилер.

Ачыкълашдырып айтсакъ, оланы сёзлерине гёре, артдагъы гюнлени узагъында коронавирус ва пневмония аврув булан авруйгъанланы санаву артып тура. Олай да, РФ-ни загьмат министерлигини таклифине гёре, вакцинаны этдирмеген ишчи оьзюню иш борчларын кютмекден азат этилегенин англатдылар.

Оьзюню сёйлевлеринде О. Абачараев ва Р. Гьиравов медицина, билим берив, социал къуллукъланы къуллукъчуларына халкъны арасында аврувну ва коронавирусгъа къаршы вакцина этивню гьакъында генг кюйде англатыв ва баянлыкъ юрютмеге чакъырдылар. Демек, шо халкъ яшлар ва уллулар булан кёп къатнай ва олар булан ишлей.

МВД-ни Къарабудагъгент райондагъы бёлюгюню ёлбашчысы Герей Гереев оьзюню сёзюнде администрацияны, МВД-ни, санитар къуллукъланы жаваплы къуллукъчуларындан хас гюплер къурмагъа ва рейд чаралар оьтгермеге чакъырды. Айтагъаным, кафелерде, аптеклерде, транспортда ва оьзге жамият жыйылагъан ерлерде маска гиймекни ва вакцина этдирмекни гьакъында баянлыкъ юрютмеге тарыкълыгъын айтды.

Генгешни тамамлай туруп, районну башчысы Магьмут Амиралиев юртланы башчыларын, юрт Жыйынланы депутатларын, жамият чалышывчуланы, тамазаланы, яшёрюмлени ва абурлу адамланы вакцина этдирмеге чакъыргъан сонг, шо гьакъда халкъны арасында генг кюйде англатыв юрютмекни тапшурду.