Иш ёлдашыбызны юбилейи

Бугюнде де А.Самадов, 75 йыл тамамланагъан чагъына да къарамайлы, районну къайсы юртунда не чара болса да, шолагъа заманында етишмеге, суратын чыгъармагъа алгъасай. Артдагъы йыллар ол айрокъда яшёрюмлени спорт булангъы яшаву, оланы уьстюнлюклери гьакъда кёп яза. Газетибизни гьар номеринде ону спортгъа багъышлангъан макъалалары бола. Шо макъалалары булан ол яшёрюмлени спортгъа бакъгъан якъда сюювюн артдыра, савлугъу болсун учун спорт булан машгъул болма, заманын савлукъ булан пайдалы оьтгерме чакъыра.

Абдуллабек Самадов 1946-нчы йылда Къарабудагъгент районну Къарабудагъгент юртунда Абдулмалик ва Гьалимат Самадовланы кёп яшлы агьлюсюнде тувгъан.

Абдуллабек Самадовну атасы Абдулмалик – Уллу Ватан давну ортакъчысы. Ол ватанны душмандан азат этмек учун къоччакъ кюйде душмангъа къаршы ябушгъан. Кёп керенлер дав майданда оьлюм булан бетге-бет ёлукъгъан. Шолай давланы бирисинде Абдулмалик Самадовну ювугъунда душманны бомбасы атылгъан. Шо атылывну натижасында ол гёзлерден сакъат болуп юртуна къайтгъан. Анасы Гьалимат да давдан сонггъу йыллар кёп загьмат тёкген, ол загьматны ветераны болгъан. Абдуллабек Самадовну яшлыгъы давдан сонггъу бек авур йыллагъа рас гелген. Демек, олар яшлайын ишге къуршалма борчлу болгъан.

А.Самадов оьзюгер 11 йыл болагъанда ишлеме ва агьлюсюне кёмек этме башлагъан. Ол колхозда ишде тарыкъ болагъан тюрлю кагъызланы, документлени етишдирмек учун почтальон болуп иш башлай. Демек, яшлайын уллу агьлюсюне кёмегин болдура. Онда ишлей туруп, яш улан яратывчулукъ пагьмуларын да яшавгъа чыгъарма токъташа. Ол бош заманы болгъанда шиърулар ва макъалалар язма башлай. Оланы алып район газетни редакциясына геле, иш ва редакцияны къуллукъчулары булан ювукъдан таныш бола.

Сонг ол заманда бир сурат чыгъарма, демек, сурат чыгъарыв булан машгъул болма башлай. Газетни бетлеринде шиърулары, макъалалары ва суратлары чыкъма башлагъанда, А.Самадов бирден-бир яратывчулукъгъа багъып ругьлана ва кёп шиърулар язмагъа, тюрлю суратлар чыгъармагъа гьаракат эте.

Сонг сурат чыгъарывгъа уьйренмек учун ол 6 айлыкъ курслагъа юрюй.

1962-нчи йылдан башлап ол заман-заман гелип газетде ишлемеге къуршала.

1965-нчи йылда А.Самадов мекенли кюйде район газетни ишине тюшюне, демек, суратчы- корреспонтдент болуп ишге тюше.

Муна, шо замандан берли А. Самадов оьзюню яшавун газет булан байлагъан. Районну юртларында оьтгерилеген бары да жыйынларда ва чараларда сурат чыгъара. Геч демей – гюн демей, исси демей – сувукъ демей, чара оьтгерилме белгиленген замангъа геч болмайлы етишип, оьзюню ишин намуслу кюйде кюте.

Район газетде ишлей туруп, А.Самадов районну яшавунда да актив кюйде ортакъчылыкъ эте, клубда оьтгерилеген оьзбашына чалышагъан чебер коллективлер булан тыгъыс байлавлукъ юрюте, бийив ансамбльге юрюй, йырлайгъан бёлюклеге къошула. Юртлагъа, къотанлагъа барып концертлер гёрсете. Районну маданият тармагъында да актив кюйде ортакъчылыкъ этеген А.Самадовгъа 2001-нчи йылны декабр айыны 19-нда Дагъыстан республиканы Пачалыкъ Советини къарары булан «ДР-ни маданиятыны ат къазангъан къуллукъчусу» деген ат ­берилген.

Район газетдеги къайратлы загьматы саялы Абдуллабек Самадов кёп керенлер районну башчыларыны янындан Гьюрметлев грамоталар, Баракалла кагъызлар булан савгъатлангъан.

Район газет булан оьзюню къысматын байлагъан газетчи, суратчы А.Самадов оьзю язгъан макъалалар, чыгъаргъан суратлар булан кёп-кёп загьматчыланы ругьун гётерип тургъан. Шо йылланы узагъында кёп загьматны игитлерини атлары газетге чыкъгъандыр, танымайгъанлар оланы таныгъандыр, газетден таба гёргендир. Олайлагъа къарап-гёрюп оьзгелер де яхшы иш гёрсетме гьаракат этгендир, уьстюнлюклеге талпынгъандыр…

А.Самадовну гьакъында айта туруп, ону иш ёлдашларына бакъгъан якъдагъы янашывун, ону оьр культурасын айрыча эсгермеге сюемен.

Ол бизин барыбызгъа да бир йимик арив сёйлеп, якълап, гёнгюбюзню алып бажара. Не къуллугъубуз болуп, ягъына барсакъ да, ол инжинмей, англамайгъаныбызны англатмагъа къарай, башгъа якъдан кёмек тарыкъ болса да, ол бизге гьар даим кёмегин болдура.

Биз, «Районну яшаву» газетни коллективи, Абдуллабек Самадовну оьзюню 75 йыллыкъ, редакцияда ишлейгенли 55 йыллыкъ юбилейлери булан къутлайбыз. Огъар гележекде къатты савлукъ, парахат яшав ва кёп яхшылыкълар ёрайбыз.