Меню
16+

Сетевое издание «Будни района»

11.06.2021 09:02 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

«Аталардан къалгъан адат»

Автор: Багьавутдин Самадов

Къайсы миллетни де оьзтёрече милли адатлары ва шогъар гёре юрюлеген мердешленген чаралары бар. Шо адатлар халкъны яхшылыкъгъа, бирликге, намус-ягьгъа, дослукъгъа чакъыра. Шо адатланы бизин ата-бабаларыбыз гёзюню бебейи йимик аявлап ва асырап сакълап гелген, наслудан-наслугъа таза кюйде тапшургъан. Бизин къумукъ миллетибизни яшавну гьар-бир тармагъына янашывлу гелеген терен маъналы адатлары ва олай да айтывлары, аталар сёзлери бар. Шоланы аслу гьалда тарихчилер, ахтарывчулар, муаллимлер, маданият къуллукъчулар, журналистлер ва оьмюрге баргъан тамазалар биле ва ахтара, оьсюп гелеген наслугъа шо гьакъда айта.

Шоллукъда, оьтген сонгугюн, июнь айны 5-нде, Къарабудагъгент юртну ЦТКНР-ни бинасында «Къумукъ маданиятны гюню» деген баш булан чара оьтгерилди. Шо чарада бизин халкъыбызны яхшы ва асил адатлары гьакъда генг кюйде айтылды, олай да сагьналашдырылгъан ­мюгьлетлер гёрсетилди.

Къарабудагъгент ЦТКНР-ни майданчасында Агъай Къаплановну атындагъы эргишилени хору районну ичиндеги юртлардан чакъырып гелген къонакъланы ашы-тузу булан къаршылай туруп, оьзюню йырын савгъат этди. Сонг чараны юрю­тювчюлери къонакъланы маданият бинасыны фойесине чакъырдылар.

Къарабудагъгент тарих-эл уьйренив музейни ёлбашчысы Ханза Алиева шо ерде къонакълагъа ва къаравчулагъа къумукъланы милли опуракъ гийимлерини, савут-сабасыны, уьй-ожакъда къолланагъан алатланы гьакъында маъналы кюйде маълуматлар берди. Ол алъякъда къатын-къызлар, янгы гелинлер онг инбашына акъчалыкъ, сол къолуна хаба тутуп сувгъа барагъаны гьакъда хабарлады.

Шо хабарлавдан сонг, къонакълар къумукъланы лап да сыйлы ашююне чакъырылды ва оланы уьйню тёр янында олтуртдулар. Чараны юрютювчюлер «Этнодворну» ёлбашчысы, ДР-ни ат къазангъан маданият къуллукъчусу Зугьра Абакаровагъа сёзню тапшурду.

«Бизин къумукъ миллетибизни той, яс, яш тувгъанда, гелин гелешеген ва оьзге тюрлю ишлеге байлавлу бек арив ва терен маънасы булангъы адатларыбыз бар. Шо адатланы бизин уллуларыбыз бизге тапшургъан. Оьз гезигибизде, бизде эсгерилген адатланы бар ва герти кюйде оьсюп гелеген наслубузгъа тапшурмагъа борчлубуз. Шоланы эсде сакъламакъ ва наслудан-наслугъа тапшурмакъ муратда бугюн биз шу чараны оьтгеребиз.

Шу чараны онгармагъа ва оьтгерме кёмеклешген ЦТКНР-ни ёлбашчысына, олай да китапхананы ва хорну къуллукъчуларына, мактапланы муаллимлерине ва охувчуларына гьакъ юрекден баракалламны, чакъырылгъан къонакълагъа разилигимни билдиремен»,-деди Зугьра Абакарова оьзюню сёйлевюнде.

Олай да, чараны барышында район администрацияны социал сиясат управлениесини ёлбашчысы Гюлжанат Темирова байрамны барышына разилигин эсгере туруп, районну гьакимбашы Магьмут Амиралиевни атындан чараны оьтгерилегени булан къутлады, насип, савлукъ, берекет, узакъ оьмюр ва шулай адатланы наслудан-наслугъа таза кюйде тапшурмакъны ёрады.

ДР-ни ат къазангъан муаллими, яшёрюмлени насигьатчысы Умусалимат Бутаева оьзюню сёйлевюнде Къарабудагъгент юртну жамияты 1940-нчы йылларда оьзге миллетни вакиллерин сыйындыргъаны, къонуш бергени гьакъда хабарлады. Демек, шо йылларда кёп кючлю ачлыкъ болгъаны белгили. Шо ачлыкъдан бир амал излей туруп гелген 20-дан артыкъ оьзге миллетни агьлюсюне къарабудагъгентлилер ашамагъа аш да, турмагъа уьй де, ятмагъа ер де бергенлигин айтды. Шо халкъ бугюн-буссагьатда да юртну ичинде яшай ва оьзлеге этген къуллукъну бир де унутмай.

Чараны барышында сёйлеген «Дагъыстан» деген РГВК-ны къумукъ берилишлерини ёлбашчысы, журналист Иса Агьматов, журналист ва шаир Багьавутдин Самадов булай бизин миллетибизни, адатларыбызны гьакъында чаралар оьтгерилегени бек тарыкълы ва пайдалы экенлигин айта туруп, шулай чараланы мердешлендирмеге ярайгъанын эсгерди.

Оьтгерилген шатлы чараны барышында ЦТКНР-ны йыравлары Аскендер Исрапилов, Гилянханым Агьматова, Абдулазим Найипханов оьзлени йырларын къаравчулагъа ва къонакълагъа савгъат этди. Олай да, А.Къаплановну атындагъы эргишилени хору къумукъланы бырынгъы юн булкъа адатны сагьналашдырды.

ЦТКНР-ны ёлбашчысы Арсланали Багьриев «Аталардан къалгъан бизге адат бар» деген баш булан оьтгерилген къумукъланы маданиятыны гюнюне багъышлангъан чараны онгаргъанлагъа, тизгенлеге, ортакъчылыкъ болдургъанлагъа ва чакъырылып гелген къонакълагъа баракалласын билдирди.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

5