Къарабудагъгент 3 номерли орта школада
Оьзге школаларда йимик, Къарабудагъгент 3 номерли орта школада да эртен сагьат 9-да Ахырынчы зенгге багъышлангъан чара оьтгерилди. Чараны гиришив сёз булан ачгъан школаны завуч-къурумчусу Таскират Пашаева, жыйылгъанланы шатлы байрам булан къутлап, 1-нчи «а», 1-нчи «б», 1-нчи «в» класланы гиччипавларын ва оланы клас ёлбашчылары З.Паталиеваны, Р.Хожаеваны ва А.Сулейманованы орталыкъгъа чакъырды. Арты булан 9-нчу «а», 9-нчу «б»,9-нчу «в» класлар клас ёлбашчылары, Айида Мутдагьирова, Написат Магьамматова, Сара Бахриева орталыкъда тизилдилер. Олай да, 11-нчи клас ва клас ёлбашчысы Зубайдат Шахманаева линейкада ерлешдилер.
Россия Федерацияны гимни согъулуп битген сонг, биринчи сёз школаны директору Гюлжанат Зайнутдиновагъа берилди. Г.Зайнутдинова чараны ортакъчыларын шатлы байрам булан къутлап, выпускниклеге алдында токътагъан ОГЭ ва ЕГЭ экзаменлерин уьстюнлю кюйде берип, юреги танглагъан охув ожакълагъа тюшюп, яшавну канзилеринден сюрюнмей юрюмекни ёрады.
Чакъырылгъан къонакъ, Къарабудагъгент школаны алдынгъы выпускниги, бугюнлерде Къарабудагъгент районну башчысыны 1-нчи орунбасары Жалалутдин Жамалутдинов да выпускниклени школаны тамамланыву булан къутлап, олагъа охувда уьстюнлюклер, насипли яшав, оьзюню охутгъан бары да муаллимлерине баракалла билдирип, макътавлу сёзлер айтды.
Сонг сёз берилген башлапгъы класланы завучу Жамиля Гьюсенова, охув ишлеге къарайгъан завучу Элмира Жамалутдинова выпускниклеге, янгы яшавгъа янгы абат алыву булан къутлап, яхшы ёл ёрады.
Арты булан 11-нчи класны охувчулары гичччипавлагъа багъышлангъан шиърулар охуду.
Выпускниклени биринчи муаллими И.Атаева охувчулагъа яхшы ёл ёрагъан сонг, олагъа 1-нчи класдагъы тептерлерин тапшурду.
Чараны ахырында 11-нчи класыны выпускниклери Азамат Гьюсенов, Азинат Пашаева ва 1-нчи «в» класыны охувчулары Умукюсюм Жамалутдинова ва Магьамматрасул Изиев ахырынчы зенгни къакъды.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.