Вакцина юрюле
Республикабызда йимик, бизин районубузда да масштаб кюйде адамлагъа коронавирус аврувгъа къаршы вакцина этив чара юрюле. Шо аврувгъа къаршы этилмеге гёрсетилген вакцинаны бары да халкъгъа этдирмеге таклиф этиле. Болса да, бир-бир тармакъларда ишлейген къуллукъчулар шону этдирмеге борчлу.
Районну ичинде юрюлеген вакцина этив чараны гьакъында Къарабудагъгент район больницаны баш врачы Расул Гьиравов булан ёлукъдукъ ва ондан шо гьакъда маълуматлар алдыкъ. Ол эсгерген кюйде, май айны ортасына «Спутник V» вакцинаны бизин районну ичинде 1865 адамгъа этди.
Вакцина этилген районлуланы яртысы – билим берив тармакъны къуллукъчулары, демек, муаллимлер, тарбиялавчулар, тренерлер ва оьзге къуллукъчулар. Ачыкълашдырып айтсакъ, билим берив тармакъны 905 къуллукъчусуна коронавирусгъа къаршы вакцина этилген.
Олай да, 381 медицина къуллукъчусуна, 266 ихтияр якълав къурумланы къуллукъчуларына укол этилгенин КЦРБ-ни баш врачы Р.Гьиравов айтды.
Коронавирус инфекция аврувгъа къаршы укол этилгенлени арасында пачалыкъ ва муниципал къуллукъчулар да бар. Шолай 78 къуллукъчугъа укол этилген. Олай да, транспорт ва энергетика тармакъны – 42, социал якълав ва кёмеклешив, МФЦ-ни – 43, гьар тюрлю къуллукъланы кютеген 16 къуллукъчугъа вакцина этилген.
Къарабудагъгент район больницаны баш врачы Р.Гьиравовну баянлыкъларына гёре, 60 йылдан оьмюр чагъы уллу пенсионерлерден 35, узакълашгъан аврувлары бар 8 адамгъа укол этилген.
Олай да, вакцина этилеген хас кабинет байрам ва ял алагъан гюнлерде де ишин юрютген ва шону давам этип тура.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
