Къонакълыкъда болдулар

Шолай, маданиятны гюнюне байлавлу болуп, март айны 26-нда Гьели юртну маданият уьюню ёлбашчысы Кюсюм Халилова, музейни къуллукъчулары, Къарабудагъгент район администрацияны маданият, туризм ва яшёрюмлерини масъалаларына къарайгъан бёлюкню ёлбашчысы Найида Мурзаева, ДР-ни ат къазангъан артисти Текмурза Бийболатов ва Гьели юртну «Ручеёк» деген яшлар бавуну гиччипавлары булан бирче Агъав Асадуллавлерде къонакълай болдулар.

Агъав Асадуллаев кёп йылланы узагъында Гьели юртда ерлешген клубну ёлбашчысы болуп ишлеген. Гьели юртну чебер яратывчулукъ коллективи булан А.Асадуллаев районда ва республикада оьтгерилеген кёп тюрлю чараларда ортакъчылыгъын болдургъан. Олар оьзлени бийивлерин, адатланы ватандашлагъа гёрсетген ва алдынлы ерлеге ес болгъанлар.

Олай да, ол 1967-нчи йылда республикада маданият къуллукъчуланы экинчи съездинде ортакъчылыкъ этген.

Кёп йылланы узагъында маданият тармакъда къуллукъ этгени саялы Агъав Асадуллаев кёп тюрлю грамоталар ва дипломлар булан савгъатлангъан.

А.Асадуллаев гелген къонакъ­лагъа оьзюню яшав ёлу ва маданият къуллукъчуланы совет девюрню вакътисинде ишлейген кюю гьакъда тындырыкълы кюйде хабарлады.

Олай да, маданият къуллукъчуланы гюнюн белгилей туруп, март айны 30-нда маданият уьюню ёлбашчысы Кюсюм Халилова, Агъав Асадуллаев Къарабудагъгент юртлу къонакълар Жавгьан Абдуллаева, Абдулазим Найипханов ва СМИ-ни къуллукъчусу Жанболат Элмурзаев кёп йылланы узагъында Гьели юртдагъы чебер яратывчулукъда ишлеп тургъан Разият Къадыровалагъа къонакълай бардылар.

Разият Къадырова кёп йылланы боюнда маданият тармакъда къуллукъ этген. Ол чебер яратывчулукъда актив кюйде ортакъчылыкъ этгени саялы, оьзюню Гостелерадиону хоруна йырламагъа чакъыргъаны гьакъында гелгенлеге къужурлу кюйде хабарлады.

Шо гюн Къарабудагъгент районну ЦТКНД-ны йыраву А.Найипханов жыйылгъанлагъа оьзюню йырын савгъат этди ва , Жавгьан Абдуллаева агъачкъомузда ойнады.