Мунда китаплар яшай
Апрель айны 19-нда Дёргели юрт китапханада 4-нчю класланы охувчулары учун «Таныш болугъуз! Мунда китаплар яшай» деген китапхана дарс оьтгерилди.
Чараны юрютген юрт китапхананы ёлбашчысы Айшат Изиева охувчулагъа китапланы кёп охумакъны пайдасы гьакъда хабарлады. Билимли ва бажарывлу болмакъ учун китапланы кёп охума, муаллимлеге тергевлю тынглама, тарбиялы болмагъа герегин айтды. Олай да, китапланы сюйме, оланы аявлап сакълама, гьар охугъан китапдан охувчу оьзюгер пайда алма гереги гьакъда Дёргели 1 номерли орта школаны муаллими Асият Магьамматова мисаллар гелтире туруп сёйледи. Охувчуланы китапхананы ичинде де, ёлда да, уьйде де оьзлени низамлы тутма чакъырды.
Сонг китапхананы актив охувчулары С.Татаева, М.Салигьова, С.Жанмурзаев китапны ва билимни гьакъында шиърулар охуду. Ерли шаир Р.Шихшайитова да яшлагъа оьзюню «Язбаш» ва «Къолунгда китап болса» деген шиъруларын охуду.
Ёлугъувну барышында Дёргели китапхананы ёлбашчысы А.Изиева китапхананы ёлугъувларында актив кюйде ортакъчылыкъ этген 4-нчю класны клас ёлбашчысы Асият Магьамматовагъа, ерли шаир Разият Шихшайитовагъа грамоталар тапшурду ва баракалла билдирди. Ёлугъувну ахырында охувчулар юрт китапханадагъы китаплар булан таныш болду, ушатгъанларын яздырып, уьйде охумагъа алды, суратлар чыгъарды.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
