Меню
16+

Сетевое издание «Будни района»

23.04.2021 09:11 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Бригадада биринчи борла гёмген къатын

Автор: Шихав Къайирбеков

«Чубугъунда иелмеген, къазы­гъында иелмес» деген айтыв яшав сюре. Ону маънасы, загьматда яшлайын чыныкъмасанг, уллу болгъанда ишден къоркъагъан, авур къол загьматдан тартынагъан болуп оьсмек бар.

Оьрде айтылып гетген айтыв бизин уллу наслубузгъа хас. Олар яшлайын ишге къуршалып гелген. Ишни хадирин билип оьсген адамлар.

Къарабудагъгентли Абаси Валиянова – гьали яхшы оьмюрге баргъан адам. Тек яш йыллар ону ёнкютмеген. Ата-анагъа кёмек болсун деп, эртерек загьматгъа къошулуп ишлеп гелген.

Алдагъы гюнлерде редакцияны суратчысы А.Самадов булан Абаси Валияноваларда къонакълыкъда болдукъ. Къатынгишиге йылларын сорама арив тюгюл. Мен де ону булан бир авулда оьсгеним саялы , ону оьмюрюн, загьмат ёлуну натижаларын яхшы билемен.

А.Валиянова – давдан алдагъы йылланы замандашы. Шогъар гёре мен гьюрметли Биби булангъы лакъырымны окоплар къазма бардыгъызмы деген соравдан башладым. Дестине ол: – Бармадым, о заман мен лап гиччи эдим. Магъа 12 йыл болагъанда Къарабудагъгент юрт­ну Улашгент участкасында мамукъларда ишлегенмен. Агьмат Гьажиев башчы­лыкъ этеген бригаданы уьюрю болуп, «Къоркъама-Хола» участкада Гибрид гьабижайгъа къуллукъ этгенмен. Гьабижайгъа эки керен къол булан каза ура эдик. Мен бизин бригададагъыланы арасында лап гиччиси эдим. Тек гюн­люк норманы ар­тыкъ этип яшавгъа чыгъармай туруп, яллыкъ билмей эдик.

Гетген асруну 60-нчы йылларында Къарабудагъгент юртдагъы Карл Маркс­ны атындагъы колхоз юзюмчюлюк «Танг» совхозгъа айланды. Шо вакъти хозяйство бир нече бёлюклеге бёлюнюп, борла орнатма, юзюм бавланы майданларын генглешдирме бары гюч салынгъан эди. Мен «Танг» совхозну биринчи бёлюгюнде ишлей эдим. Бригадирибиз Абдулмежит Къурбанов эди, — деди.

- Совхозда биринчилей борла орнатагъан заманыгъыз эсигиздеми?

- Воллагь, бугюн йимик эсимде. Гюнагьларындан Аллагь гечсин, бригадирибиз А.Къурбанов гече уьйлерибизге гелип, тангала ишге чыкъмай къалмагъыз, борла орнатма башлайбыз деп билдирип гете эди. «Къоркъама-Холада» 19 номерли участкада биринчи борланы мен гёмгенмен. Шолайлыкъда, бизин бригада юзюмчюлюк бригадагъа айланды.

Юзюмчюлюк – хайырлы тармакъ. Амма къуллугъу кёп. Къышы-язы булан юзюм бавда ишчиге ишлеме иш табула. Шо заманларда борланы бары къуллукъларын сан янлы кютюп, кёп юзюм болдурма къаст эте эдик. Юзюмчюлюкде ишлейген ишчилени айлыкъ алапалары яхшы эди. Юзюм болдурувда планланы артыкъ этип толтургъаныбыз саялы, йылны ахырында яхшы къошум гьакълар да ала эдик.

Мени ишге белсенгениме къарап, анам: – Бираз аста къой, къаркъарангны ая, — дей бола эди. Воллагь, къаркъарабызны аямадыкъ. Гюнню узагъында авлакъларда ишлеп, ахшам ишден къайтагъанда «Заммайда» тюшюп, согъан десетинлени чёбюн алдыкъ, каза да урдукъ, кёп согъан да бола эди.

- Сиз районда юзюмчюлюк тармакъда айрыча гектарлар алып къуллукъ этгенлени бирисиз. Гектар алып айрыча ишлейим деген ойгъа нечик гелдигиз?

-Уьлкени башын тутгъанлар юрт хозяйство производствону асувлулугъун гётермек муратда ойлаша болгъандыр. Бригадирибиз Абдулмежит Къурбанов тюшашда ял алма олтургъан вакътиде къырыйыбызгъа гелип,

- Гектарлар алып юзюмге къуллукъ этме сюегенигиз бармы? Техкарта да гёрсетилеген чакъы планны бересиз, къалгъаны сизин аты­гъыздан бериле, борлагъа яхшы къуллукъ этсегиз, кёп юзюм болдурсагъыз, къазанчыгъыз артыкъ болажакъ,- деп, башыбызны къыздырып йиберди. Иш ёлдашларым: Алпият Исрапилова, Гьумаржан Ибрагьимова булан сёйлешип, 7,5 гектар ердеги юзюмлюклени къуллугъун кютме бойнубузгъа алып ишледик.

-Айрыча ер алып ишлеген сонг, жавапчылыкъ да арта. Бары да агротехника къуллукъланы заманында кютме тарыкъ, жавапчылыкъдан къоркъмадыгъызмы?

- «Башына тюшген башмакъчы болур» дегенлей, арбаны боюнсасына егил­ген сонг, ону тартма гьитинме тарыкъ. Бизге де алгъан ишибизни ярты ёлда яйып къоймас учун, гьаракат этме, белсенип ишлеме тюшдю. Борлагъа къуллукъ этивде авлетлерибизни къуршап, оьзгелеге уьлгю гёрсетип ишледик.

- Сиз совхозда ишлеген йылларыгъызда яллыкъ­ тапмай ишлегенигизге, савлугъугъузну аямагъаныгъызгъа гьали гьёкюнмедигизми?

- Аякъларым бираз инжитсе тюгюл, оьмюрюме гёре савлугъум яман тюгюл. Белбюгюп, этекчалып, арымай-талмай ишлегениме бир де гьёкюнмеймен. Къайратлы кюйде загьмат тёкгениме «этегимни» толтуруп пенсия да аламан. Аллагьгъа арты битмейген макътавлар болсун!

Абаси Валиянова – оьзюню заманында загьматны уьлгюсюн гёрсетип ишлеп гелгенде йимик, уьлгюлю ожакъ да тутгъанланы бири. Агьлюсю Абдулгьуда Валиянов да районну гьар тюрлю тармакъларында намуслу кюйде ишлеп гелген. Ол редакцияда да шофёр, типографияны ёлбашчысы болуп бир къадар загьмат тёкдю. Халкъ арада болгъур адам.

Абаси ва Абдулгьуда бирликде ожакъ тигип яшайгъаны 65 йылгъа ювукъ бола. Насипли агьлю 3 улан ва 2 къызны адилли кюйде тарбиялама бажаргъанлар. Валияновланы авлетлери яшавда оьз ерин тапгъан. Гьарисини айрыча ожакълары бар. Чинкдеси, бизин макъаланы игитини 20 торуну (внугу) ва 47 торуларыны яшлары(правнугу) бар. Бу – уллу байлыкъ ва аркъатаяв.

Биз де Абаси ва Абдулгьуда Валияновлагъа авлетлерини, авлетлерини, авлетлерини яхшылыкъларын гёрме савлукъ булан оьмюр ёрайбыз.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

3