Меню
16+

Сетевое издание «Будни района»

19.03.2021 10:31 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Министр бизин районда

Барыбызгъа да белгили кюйде, март айны 11-13-нде токътавсуз явгъан къар районда табии къоркъунчлукъну тувдурду. Суткалар булан токътавсуз явгъан къар ватандашланы яшавлукъ уьйлерине, гётермелерине бек зарал этген юртлар да бар. Ара бёлмей явуп тургъан къар районну юрт хозяйство тармагъына, ачыкълашдырып айтгъанда, теплица хозяйствосуна, гьайванчылыкъ, къушчулукъ биналагъа мекенли зарал гелтирген. Районда табии авурлукълардан сонг, районда бар 173,3 гектардагъы теплицаланы 58,4 гектары толу бузулгъан, 48,3 гектардагъы теплицаланы пленкасы йыртылгъан. Узакъ болжаллы къар явувлардан сонг, районда тувулунгъан бу гьалны мекенли билмек учун алдагъы гюн районгъа къарабудагъ­гентли ДР-ни маълумат ва печатгъа къарайгъан министри Умарос­ман Гьажиев Къарабудагъгент районда болгъан.

Министр оьзюню сапарында районда тувулунгъан къувунлу гьал булан ювукъдан таныш болгъан. Районну башчысы М.Амиралиев булан ёлукъгъан ва табии хатабалагьлардан зарал гёрген ёлдашлагъа кёмек, якълав этивню ёлларын арагъа салып ойлашгъанлар.

У.Гьажиев бизин районгъа этген сапарында табии гьалны натижасында зарал гёрген ёлдашлар булан да ёлукъгъан.

«Гьал гертиден де тамашагъа къалдыра. Булай къалын къар бизин якъларда артдагъы 40-50 йылланы узагъында болмагъан. Эки сутканы узагъында бир токътавсуз явуп тургъан къар иримей явуп тургъан буса, болагъан заралны къадары дагъы да кёп болур эди, бетерин Тенгирибиз бермесин», — деген Умаросман Гьажиев.

Токътавсуз явуп тургъан къардан айрокъда Къарабудагъгент, Уллубийавул, Паравул юртланы ватандашлары артыкъ зарал гёргенлер.

- Хатабалагь районну юрт хозяйство тармагъына этген заралны гьасиллерин чыгъарма тез, тек овошчулукъ, гьайванчылыкъ, къушчулукъ тармакълар уллу тас болувлагъа тарыгъан,- деген У.Гьажиев.

Ерлерде болуп, гьалны мекенли гёрген сонг, министр районгъа пачалыкъны янындан мекенли якълав, кёмек болмаса, хатабалагьны алдын алма, зарал гёрген уьйлени, юрт хозяйство тармакъланы аякъгъа тургъузма рагьат болмажагъын англатгъан.

Не этме тарыкъ, табии гьал адамыбызны тас этивге тарытгъан. Гётермени тюбюнде къалып бир яш оьлген, биревюсю заралланып, огъар медицина кёмеги болдурулуп тура.

Республиканы Башчысыны заманлыкъгъа борчларын кютеген С.Меликов райондагъы гьалны башындан башлап оьзюню тергевюню тюбюне алгъан ва райондагъы гьалгъа тергев эте. Зарал гёрген юртлагъа дестине МЧС-ни гючлери йиберилген. Къардан болгъан заралны алдын алмакъ, ватандашлагъа кёмеклер болдурмакъ учун чаралар гёрюле.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

7