Чара оьтгерилди
Ана тил… Бу сёзлени айтгъандокъ, гьар адамны юрегинде анасына, ата юртуна, элине бакъгъан сюювю, сагъынчы, оьктемлиги тувулуна. Ана тилибиз бизин лап да уллу жан азыгъыбыз, хазнабыз.
Ата-бабаларыбыздан гелген ана тилибизни асырап, аяп сакъламакъ да – бизин инг де аслу борчубуз. Гиччиден берли биз биринчилей ана тилибизни уьйренебиз.
Ана тилибизни гележеги де, бугюнгю гьалы да оьсюп гелеген наслудан гьасил бола.
Ана тилибизни асырап-аяп сакъламакъ учун гьар адам оьзюню къолундан гелеген гьаракатны этме тюше.
Шолай болсун учун, ана тилге сююв анасыны тилинден сингип, агьлюде тарбияланып, ана тилине гьакъ юрекден жамият арада оьсме герек.
Гьар йыл февраль айында ана тиллени гюнюне багъышлап, районну охув ожакъларында тюрлю чаралар оьтгериле.Ана тиллени байрамы ана тилин сюйме, аявлама уьйрете.
Шолай, алдагъы гюн, февраль айны 21-нде, Манасгент орта школада «Ана тиллени Халкъара гюню» деген байрам чара оьтгерилди.
Чараны ана тиллени муаллимлери А. Гьасанова, Д. Къурбанова, Л.Ражапова ва Г. Къайырбекова онгаргъан эди.
Шо гюнгю чарада школаны муаллимлери, школаны ёлбашчысы Зюлфия Сайитова ва 1-11-нчи класланы охувчу яшлары ортакъчылыгъын болдурду.
Чараны юрютювчюлери – школаны муаллимлери Гюлизар Къайырбекова ва Лайла Ражапова оьзлени гиришив сёзюнде чараны ортакъчылары булан саламлашгъан сонг, къумукъ халкъны тарихи, адабияты, маданияты, аты белгили къагьруман уланлары ва къызлары гьакъда бай маълуматлар бердилер.
Оланы маълуматларындан сонг, школаны 6-нчы «б» класыны охувчу яшлары Асият Къазувова, Залина Абдуллаева ва 4-нчю «д» класны охувчусу Нюрислам Исрапилов къумукъ тилге багъышлангъан терен маъналы шиърулар охудулар.
Башлапгъы класланы къызлары милли бийивлерин гёрсетип, жыйылгъанланы разилигин къазанмагъа бажарды. 7-нчи класланы охувчу къызлары «Тил билдирген тырнавуч» деген асарны сагьналашдырды.
Олай да, чараны барышында 5-нчи класланы охувчу яшлары къумукъ шаирлени шиъруларын охуду, 11-нчи класны охувчу къызлары буса «Чыгъып-чыгъып» деген йырны йырлады.
Шо гюнгю чарада бары да охувчулар актив кюйде ортакъчылыгъын болдурдулар ва жыйылгъанланы разилигин къазанды.
Чараны ахырында сёйлеген школаны ёлбашчысы Зюлфия Сайитова охувчу яшлагъа ана тилин сюймеге, аявламагъа ва билмеге чакъырды.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
