Стратегиягъа къаралгъан

Демек, шо Стратегияны ичинде республикабызны оьсювюн болдурмакъ учун хас къарарлар, проектлер ва оьзге тюрлю документлер къабул этилмеге гёз алгъа тутулгъан. Олай да, шоланы оьсювю болсун учун борчлар салынгъан.

Эсгерилген Стратегияны аслу мурады – инг башлап, халкъны яшав даражасын артдырмакъ. Шо муратны яшавгъа чыгъармакъ учун буса янгы иш ерлер болдурмагъа, алапаланы даражасын артдырмагъа, билим берив ва савлукъ сакълав къуллукъланы яхшылашдырмагъа, олай да яшавлукъ-коммунал хозяйствону, ёлларда ярыкъ ва газ булан таъмин этивде шартлар болдурулмагъа герек.

ДР-ни Гьукуматыны ёлбашчысыны заманлыкъгъа борчларын кютеген Нюсрет Омаров эсгерген кюйде, Стратегияны кюрчюсю иш гюпню уьюрлери булан мекенлешдирилген. Болса да, шо хас документге толумлашдырывлар ва алмашынывлар этмек учун таклифлер къабул этиле.

«Бугюн-буссагьат биз арагъа салып ойлашагъан Стратегияны кюрчюсюн февраль айны ахыры болгъунчагъа тасдыкъ этмеге борч­лубуз. Шону булан янаша, Стратегияны яшавгъа чыгъармакъ муратда чараланы планын мекенлешдирмеге герек. Стратегияны яшавгъа чыгъармакъ учун, озокъда, финанс якъдан харж маялар болмагъа тарыкълыгъы ачыкъдан да ачыкъ», — деп эсгерген Нюсрет Омаров оьзю­ню сёйлевюнде.

Оьтгерилген генгешни барышында республикабызны министерликлерини ва идараларыны ёлбашчылары, муниципал къурулувланы башчылары, илму ва жамият бирлешивлени вакиллери ва алимлер оьз­лени ортакъчылыгъын болдургъан.

Иш гюпню генгешини ахырында ДР-ни экономика оьсюв министерлигине ДР-ни 2024-нчю йылгъа ва 2030-нчу йылгъа планлашдырылгъан социал-экономика оьсювюню Стратегиясыны проектине гёре берилген таклифлени ва пикруланы топламагъа ва шогъар гёре хас документлер онгармагъа тапшурулгъан.