Вакцина этив юрюле

Бизин уьлкеде чыгъарылгъан «Спутник-V»-ни асувлугъу гюн сайын ташдырыла. Буссагьатгъы вакътиде бизин уьлкеде чыгъарылагъан «Спутник-V» вакцинаны оьзлени ватандашларына вакцина этмек муратда дюньяны 30-дан да къолай пачалыгъы Россия булан дыгъарлар байлап, вакцина этме башлагъаны да кёп затны англата.

Бизин районда да коронавирус инфекциягъа къаршы адамланы вакцинация этив гьаракат гюн сайын чалтлаша. Бу ишде районну гьакимбашы, медицина къуллукъчулар, жаваплы къуллукъланы вакиллери яхшы сипте гёрсетелер.

Алдагъы гюн «Къарабудагъгент район» муниципал районну гьакимбашыны орунбасары Жалалутдин Жамалутдинов коронавирусгъа къаршы вакцинация этдирген.

«Мунда къоркъма зат ёкъ, гьар тюрлю терс лакъырлагъа инанма та­рыкъ тюгюл, вакцина биринчилей бизин ва дос-къардашларыбызны, жамиятыбызны, айрокъда уллу наслубузну савлугъу учун этиле. Вакцина этдирив гёнгюллю иш, сюйген адам этдире, амма этдирсе яхшы. Шо гюн мени булан бирче Россияны ОМВД-ни бизин районгъа къарайгъан бёлюгюню начальниги Герей Гереев, депутатланы район Жыйыныны председатели Адил Салаватов, Губден юртну башчысы Осман Жалилов, районну спорткомитетини председатели Завур Умаракъаев, район администрацияны налоглагъа ва оланы жыйылывуна къарайгъан бёлюгюню ёлбашчысы Элдар Гьюсейнов, районну билим берив управлениесини ёлбашчысыны орунбасары Магьамматсайит Гьажимагьамматов ва оьзге къурумланы къуллукъчулары вакцина этдирдилер. Врачлар айтагъан кюйде, вакцинация этдирив гёнгюллю иш буса да, бары да халкъны къуршалыву – аврувну алдын алывда инг гёрмекли чара. Барыбыз да бирче вакцина этдирсек, биз коронавирус инфекция аврувну енгме, ондан уьст болма болажакъбыз»,-дей Жалалутдин Жамалутдинов