Йылны гьасиллери чыгъарылды

Сессияны «Къарабудагъгент рай­он» муниципал районну депутатларыны Жыйыныны председатели Адил Салаватов ачды ва юрютдю. Ол жыйылгъанланы гезикли сессияны гюнлюк низамы булан ювукъдан таныш этген сонг, «Къарабудагъгент район» муниципал районну гьакимбашы Магьмут Амиралиевни районну администрациясыны 2020-нчы йылдагъы гьасиллери булан сёйлемеге чакъырды.

Трибунагъа гётерилген районну башчысы Магьмут Амиралиев, инг башлап, залдагъылагъа, районну активине коронавирус аврувгъа къаршы вакцина этмеге таклиф этди. Демек, аврувну яйылывуну алдын алмакъ учун вакцинаны этмеге гереклигин англатды. Олай да, ол 2020-нчы йылны язбаш-яй вакътисинде коронавирус аврувгъа къаршы чалышгъан ва ишлеген медицина, социал, ихтияр якълав ва оьзге къурумланы вакиллерине баракалласын берди.

Сонг М. Амиралиев 2020-нчы йылны гьасиллери гьакъда оьзюню сёйлевюнде мекенли кюйде айтды. Масала, оьтген йылны боюнда болдурулгъан умуми продукцияны къадары 6 миллиард 268 миллион манатдан артгъан. 2019-нчу йылда – 6 миллиард 3 миллион манат эди.

Олай да, юрт хозяйство тармакъда 2020-нчы йылда 5 миллиард 369 миллион манатны оьлчевюнде мал болдурулгъан буса, 2019-нчу йылда – 5 миллиард 106,6 миилион манат.

Промышленност тармакъда да болдурулгъан малны къадары гетген йылда осал тюгюлюн, инвестиция маялар да авур йылгъа къарамайлы къоллангъанын ол айрыча эсгерди. Оьзюню докладында районну башчысы М. Амиралиев ишчилени алапалары да артгъанын аян этди.

2020-нчы йылны гьасиллерин чыгъарып этген сёйлевюнден сонг, районну гьакимбашы Магьмут Амиралиев район Жыйыныны депутатларына, юртланы башчыларына, районну ичиндеги бары да идараланы ёлбашчыларына бирдагъы керен разилигин ва баракалласын билдирди.

Ондан сонг трибунагъа «Карабудахкентское ДЭП-17» АО-ну ёлбашчысы Вагьапгьажи Алиев, Къарабудагъгент ЦРБ-ни баш врачы Расул Гьиравов, билим берив управлениени ёлбашчысы Тажли Хизриева, Пенсионный фондну райондагъы бёлюгюню ёлбашчысы Абдуразакъ Айдиев, «Шанс» деген КФХ-ны башчысы Зиявутдин Абдуллагьатов, районну тамазаларыны Советини ёлбашчысы Абдулгьамит Мамагишиев гётерилдилер ва, районну гьакимбашыны докладына гёре оьзлени пикруларын айтып, район Жыйыныны депутатларына ону тасдыкъ ва къабул этмеге таклиф этдилер.

Район Жыйыныны депутатларыны ёлбашчысы Адил Салаватов оьзюню иш ёлдашларына районну башчысыны докладын къабул этмекни таклиф этген сонг, олар бир гёнгюлден ону къабул этдилер.

Олай да, сессияны барышында депутатлар район бюджетге алмашынывлар, район администрацияны структурасын тасдыкъ этдилер ва оьзге гётерилген масъалалагъа гёре къарарлар чыгъардылар.

“Къарабудагъгент район” муниципал районну Жыйыныны депутатларыны 5-нчи гезикли сессиясыны барышында 2020-нчы йылда иш уьстюнде уьлгюлю загьмат тёкгенлеге район администрацияны атындан гьюрметлев грамоталар ва акъча савгъатлар тапшурулду.