Теннисден гезикли ярышлар
Алдагъы гюн, февраль айны 21-нде, Къарабудагъгентдеги «Олимп» спорткомплексинде район администрацияны ва спорткомитетни сиптечилиги булан районну теннис ойнавчуларыны арасында столда ойнайгъан теннисден районда биринчилик учунгъу гезикли ярышлар оьтгерилди.
Юрюлген шо ярышларда районну юртларындан гелип жыйылгъан 28 оюнчу ортакъчылыкъ этдилер. Олар барысы да судьяланы чёп салывундан сонг, залны ортасында ерлешген столланы эки башын гезикли оюнчулар еледи, судьяны билдиривюне гёре теннис ярышлар башланды. Шолайлыкъда, теннис ойнавчулар бир-бири булан эришип ойнай туруп, ахшамгъа таба ярышлар тамамланды ва алдынлылар мекенлешди. Къурбукиден гелген теннис ойнавчу Магьамматшапи Зайнутдинов шо гюнгю ярышларда 1-нчи ерни алмагъа бажарды. Уллубийавуллу Абдурагьман Абдурагьманов буса 2-нчи ерге ес болду. Къурбукили Магьамматмурат Абулашев де шо ярышларда 3-нчю ерни къазанды. Ярышны алдынлыларын къутлавда ва савгъатлар тапшурувда район администрацияны аппаратыны ёлбашчысы Жамалутдин Имакъов ва спорткомитетни ёлбашчысы Завур Умаракъаев ёлдашлар ортакъчылыкъ этдилер ва алдынлылагъа кубоклар, грамоталар, медаллар, олай да акъча савгъатлар тапшурдулар.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
