Китаплар савгъат этди

Къарабудагъгент районну Баш китапханасы шо акцияда 2015-нчи йылдан берли ортакъчылыгъын болдура.

Февраль айны 15-нде Къарабудагъгент районну Баш китапханасында «Китапланы сююв булан савгъат этигиз-2021» деген чара оьтгерилди.

Шо гюн китаплар савгъат этеген акцияда Къарабудагъ­гент районну башчысыны 1-нчи орунбасары Жалалутдин Жамалутдинов, районну социал сиясат управлениесини ёлбашчысы, райондагъы къатынланы советини председатели Гюлжанат Темирова, районну тергев-гьисап палатасыны ёлбашчысы, ДР-ни белгили экономисти Абдулгьамит Айдиев, районда маданиятны, туризмни ва яшёрюмлени бёлюгюню ёлбашчысы Найида Мурзаева, районну тамазаларыны советини ёлбашчысы Абдулгьамит Мамагишиев, «Районну яшаву» газетни редакторуну орунбасары Багьавутдин Самадов, СМИ-лени вакиллери ва китапхананы охувчулары ортакъчылыкъ этди.

Чараны юрютювчюлери Азинат Пашаева ва Динаханым Ильясова жыйылгъанлагъа оьтгерилеген акцияны тарихини гьакъында хабарлай туруп, Къарабудагъгент районну башчысыны биринчи орунбасары Жалалутдин Жамалутдиновгъа сёз берди.

Ол оьзюню сёйлевюнде китапланы охумагъа ва аяп сакълама тарыгъыны гьакъында айта туруп, районну китапханасына оьзюню атындан «Наш Дагестан» деген Агьмат Жачаевни китапларын савгъат этди.

Чарада ортакъчылыкъ этген «Губден и губденцы» деген китапны автору Абдулгьамит Айдиев гьалиги компьютер технологияланы заманында китапланы унутмагъа ярамайгъанны, оланы охумагъа герекни гьакъында жыйылгъан яшлагъа хабарлады ва оьзюню атындан китапханагъа китапларын савгъат этди.

Олай да, чарада ортакъчылыкъ этген шаир Багьавутдин Самадов да район китапханагъа оьзюню китапларын савгъат этди.

Шо гюн акцияны ортакъ­чылары Гюлжанат Те­ми­рова, Абдулгьамит Мамагишиев, КЦСОН-ну къуллукъчусу На­рис Лабазанова китапханагъа китаплар тапшурду.

Районну тарих ва эл ахтарыв музейини ёлбашчысы Ханза Алиева китапханагъа оьзюню уллатасы пачалыкъ ва жамият чалышывчу Алипаша Умалатовну китапларын савгъат этди. Демек, шо гюн китапханагъа 100-ден артыкъ китап савгъат этилинди.

Шо гюн китапхананы актив охувчулары, Къарабудагъгент гимназияны охувчу яшлары шиърулар охуду ва ватандашлагъа китапланы пайдасыны гьакъында хабарлады. Акцияда ортакъчылыкъ этгенлер китаплагъа багъышлангъан белгили айтывлар ва аталар сёзлер айтды.

Къарабудагъгент Баш китапхананы ва районну юртларындагъы китапханаланы къуллукъларын кютеген Центрны къуллукъчулары оьзлени атындан акцияда ортакъчылыкъ этгенлеге барына да баракалла билдирди.

Олай да, февраль ай битгинче, китаплар савгъат этме сюегенлер район китап­ханагъа гелип оьзлени савгъатларын берип болажакъ.