Къатты чаралар гёрюлмесе...

Чараны гиришив сёз булан районну башчысыны биринчи орунбасары Ибрагьим Абдулмежитов ачды ва юрютдю. Ол оьзюню къысгъаракъ сёйлевюнде залдагъылар булан саламлашып битген сонг, шо гюн арагъа салынып ойлашылагъан масъалаланы малим этди.

Район администрацияны ноябр айыны ахырынчы гюнюнде болгъан чарада, баягъы, шо ватандашлар вакцина этдиривню барышы гьакъда бирдагъы керен айтылды. Шо гьакъда районну башчысыны орунбасары Жалалитдин Жамалутдинов гьисап берди. Ону сёйлевюнден ачыкъ болгъаны йимик, коронавирус инфекция аврувну алдын алмакъ учун районну 47 минг ватандашы вакцина этдирме тарыкъ. Тек, районда ватандашлар вакцина этдирсин учун нечакъы да айтыла, англатыв ишлер юрюле буса да, районда адамлар вакцина этдирме алгъасамайлар. Аврув себеп болуп, гьар гюнлер булан районну юртларында адамлар оьле. Коронавирус инфекция аврувдан авруйгъанлар арта, больницалагъа тюше. Тюшсе-тюшсюн, вакцина этдирив гьаракат районда тёбен даражада. Докладчыны сёйлевюнден ачыкъ болгъаны йимик, буссагьатгъы вакътиде районда 10 мингге ювукъ адам вакцина этдирген. Шо республиканы районларыны ичинде лап осал гьасил экенни айтды Ж.Жамалутдинов.

Оьзюню сёйлевюнде Ж.Жама­лутдинов вакцина этдиривде Къакъашура, Къарабудагъгент юртланы макътады. Къакъашурада вакцина этдирив – 40, Къарабудагъгентде 37 процент. Докладчы оьзюню сёйлевюн тамамлай туруп, вакцина этдиривде Дёргели, Манас, Аччы-сув юртланы ва оьзгелерин танкъыт этди.

Районда ватандашлар вакцина этдирсин учун гьар тюрлю чаралар гёрюле. Шолай чараланы бириси администрацияны янында 7 ишчи группа къурулгъан. Олар адамлар кёп жыйылагъан ерлеге, сатыв-алыв точкалагъа, гиччи далапчылыкъ булан машгъул къурумлагъа тергев рейдлер оьтгере, протоколлар яза. Шо группалар районну ГО ва ЧС бёлюгюне табиъ.

Чарада ГО ва ЧС-ни район бёлюгюню ёлбашчысы А.Османов гьисап берди. Ону сёйлевюнден ачыкъ­ болгъаны йимик, оьтгерилген тергевлени натижасында 34 протокол акт язылгъан.

Чарада район больницаны баш врачы Расул Гьиравов районда коронавирус инфекция аврув булангъы гьал, ерлерде вакцина этдиривню барышы гьакъда генг кюйде маълумат берди. Ону сёйлевюнден ачыкъ болгъаны йимик, артдагъы гюнлерде коронавирусдан авруп больницагъа тюшгенлени санаву артагъанын, оланы арасында гьалы авур барларын ачыкъ этди. Больницада адамлагъа вакцина этмек учун таман даражада доза барын, тарыкъ болса, дагъы да гелтирме болагъанын ачыкъ этди.

Расул Гьиравов оьзюню сёйлевюнде школаларда, яшлар бавларында грипден кёп яш авруйгъанын да ачыкълашдырды.

Чарада чыгъып сёйлеген юртланы башчылары Магьамматсолтан Гьасанов ва ­оьзгелери халкъланы арасында шунча заман вакцина этдирмекни гьакъында англатыв ишлер юрюлсе де тийишли натижа бермейгенин, адамланы вакцина этдирмек учун тийишли къурумланы янындан къатты такъсырлав чаралар гёрюлмесе, дагъы ёл къалмагъан деген пикирни гётердилер.