Музейге экскурсия
Къарабудагъгент 2 номерли орта школаны ана тил дарсланы юрютеген муаллимлери Л.Гьабилляева ва М.Зайналова 5-11-нчи класланы охувчулары булан Магьачкъала шагьардагъы Анвар Гьажиевни мемориал музей-уьюне экскурсиягъа баргъан. Олар Анвар Гьажиевни уланы, шаир, драматург ва таржумачы Гьажиев Багьавутдин Анварович булан ёлукъгъан. Ол къонакъланы бек арив, исси къаршылагъан сонг, оьзюню атасыны яшав ёллары ва яратывчулугъу гьакъда хабарлагъан. Б.Гьажиев оьзюню атасыны уью музейге нечик айлангъаны гьакъда да охувчулагъа англатгъан.
Анвар Гьажиев 1914-нчю йылда Кёстек юртда тувгъан. Ол къумукъ халкъны оьктемлиги. Ону поэзиясы къумукъ халкъны адабиятында гёрмекли ерни тута. А.Гьажиев кёп тюрлю ерлерде ишлеген, нече-нече китапланы автору, Дагъыстанны халкъ шаири. Къумукъ адабиятны чебер сёзюню устасы Анвар Гьажиев къумукъ поэзиябызны гётермек учун кёп иш этген. Атасындан сонг ону уланы, шаир Б.Гьажиев атасыны эсделигине гьюрмет этип, ол къоллагъан затлар тас болмасын, ону гьакъында гележек наслу билсин деп ону уьюнде музей этген...
Охувчулар шаирни гьакъындагъы хабарлагъа бек иштагьлы тынглагъан. Ана тилни, къумукъ поэзияны гьакъында оьтесиз къужурлу хабарлагъан Б.Гьажиев охувчуланы ана тилин сюйме, билме, ону булан оьктем болма чакъыргъан. Охувчулар музейге, ондагъы язывчу ва шаир А.Гьажиевни гьакъында язылгъан затлагъа, ол къоллагъан алатлагъа бек тергевлю къарагъан.
Охувчулар экскурсиядан бек рази къалгъанлар. Уьйге къайтывунда олар сав ёл музейде гёргенлерини гьакъында хабарлай, ойларын айта туруп, ёлну битгенин де эс этмей къалгъан.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
