Байрамыбыз булан къутлады

Татлиликлери ва гюллери булан оьзлеге абур этип гелген къо­накъланы редакцияны коллективи бек исси къаршылады.

Ёлугъувну барышында Баш китапхананы ёлбашчысы А.Па­шаева биринчилей редак­цияны коллективин юбилей булан къутлагъан сонг, тюрлю йылланы газетлери, гьар тюрлю юбилейлеге багъышлангъан макъалалар булангъы алдын ерли гьазирлеген выставка булан таныш этди ва ону гьакъында хабарлады.

Олай да, «Районну яшаву» газетни коллективин 70 йыллыкъ юбилейи булан къутлагъан Н.Мур­заева редакцияны къуллукъчуларына савлукъ ва яратывчулукъ, уьстюнлюклер ёрады.

Сонг ёлугъувну юрютювчю А.Пашаева район газетни баш редактору Асадулла Гьажиевге сёз берди.

Оьзюню сёйлевюнде А.Гьажиев газетни тарихи гьакъда мекенли маълуматлар булан сёйледи.

-Бизин газетге ноябр айда 70 йыл тамамлана.

Шо йылланы ичинде кёп редакторлар ва мухбирлер алышынгъан. Олай да, газетибизни аты да алышынып юрюген. Ким редактор болса да, мухбирлер алышынса да, газетни аслу мурады алышынмагъан. Газетде гьар заман районну халкъыны уьстюнлюклери, экономиканы оьсювю ва башгъа масъалалар гьакъда макъалалар печать этилинип тургъан. Бизин газетде ишге уьйренип гетген мухбирлер кёбюсю республика газетде де ишлеген. Оланы арасындан шаирлер ва язывчулар чыкъгъан.

Биз оланы атларын гьар даим уллу гьюрмет булан эсгеребиз. Бугюнлерде ишлеп турагъан мухбирлерибиз де бек гьаракат этип чалыша. Оланы загьматы да макътавгъа лайыкълы…,- деп хабарлай газетни баш редактору Асадулла Гьайбуллаевич.

Сёз берилген Къарабудагъгент 3 номерли орта школаны охувчулары район газетни коллективине, 70 йыллыкъ юбилейге багъышлап шиърулар охуду.

Ёлугъувну хас бёлюгюн тамамлай туруп, газетни баш редактору А.Гьажиев оьзлеге гелген къонакъ­лагъа оьзюню коллективини атындан баракалла билдирди.

Ёлугъув татлиликлер булан чай ичив, эсге алывлар ва суратлар чыгъарыв булан узатылды.