Оперштабны гезикли жыйыны

Уьлкени бир-бир регионларында инфекция аврув булангъы гьал дагъы да авур. Больницаларда аврувлагъа ятма ерлер етишмейген, дарманланы ва кислородну къытлыгъын гьис этеген регионлар бар.

Дагъыстанда, шону ичинде бизин районда да коронавирус инфекция аврув булангъы гьал лап къоркъунч­лу тюгюл буса да, коронавирус инфекция аврувдан авруйгъанланы санаву, артса тюгюл, кемимей.

Районну гьакимбашы тийишли къуллукъланы касбучулары булан бирликде коронавирус инфекция аврувну яйылывун токътатмакъ муратда ватандашлар вакцина этдирсин учун халкъланы арасында англатыв ишлер оьтгериле, чакъырывлар этиле, ватандашланы вакцина этдирме иштагьын гелтирмек учун оьз тюрлю къайдаланы да къоллап иш юрюле. Болса да, коронавирус инфекция аврувну алдын алывгъа бакъдырылгъан гьаракат тийишли натижа бермей тура. Адамлар, къайдагъы айтды-къуйтду сёзлеге инанып, вакцина этдирме сюймейлер. Шо къоркъунчлу инфекция аврувдан уьст болмакъ учун ватандашланы 70-80 проценти вакцина этдирме тарыкъ яда буса шо аврувдан авруп сав болма герек.

Октябр айны 27-нде районну башчысы М.Амиралиевни ёлбашчылыкъ этивю булан районда коронавирус инфекция аврувну алдын алмакъ, яйылывун токътатмакъ муратда оператив штабны жыйыны болду. Жыйынны барышында районну башчысы М.Амиралиев инфекция аврув булан ябушув юрюте туруп, федерал оьлчевде къабул этилген чараланы гьисапгъа алып, районда къошум дазуланыв чаралар къабул этилгенин эсгерди.

Районну башчысы М.Амиралиев РФ-ни Президенти В.Путинни къарары булан октябр айны 30-дан ноябр айны 7-си болгъунча уьлкеде алапасын сакълап ишлемейген гюнлер экенин бирдагъы керен такрарлады.

Сёзюн узата туруп, районну башчысы М.Амиралиев республика оператив штабны заседаниесинде бир-бир дазуланыв чаралар къабул этилгенин малим этди. Демек, октябр айны 28-нден тутуп, бир-бир объектлеге, чаралар оьтгерилеген биналагъа QR-кодлар булан гирме къоягъанын малим этди.

Шолар: — сатыв-алыв центрлер;

-увакълап ашамлыкъ тюгюл маллар сатылагъан майданы 400 кв.метрден оьрдеги объектлер;

- жамият ашамлыгъы;

-театрлар, кино гёрсетеген ерлер, спорт центрлар, фитнес заллар ва оьзгелери .

Дагъы да эсге салды, оьмюрю 60-дан оьтген вакцина этдирмеген къуллукъчуланы 4 жума уьйден туруп ишлейген къайдагъа гёчюрмек.

– Ондан къайры да вакцина этдирме адамланы иштагьын гётермек учун къурумлар, идаралар оьзлени къуллукъчуларыны вакцина этдирме гёнгюн гётермек учун эки гюн алапасын сакълап ял алагъан гюнлер берме къарар къабул этилген. О гюнлени ватандашлар вакцина этдирмек, вакцинадан сонг къаркъарасын ерине гелтирмек учун къоллама бола, – деди М.Амиралиев.