«Тил оьлсе, халкъ да оьле»

Шоллукъда, 19-нчу октябрде Къарабудагъгент юртну ЦТКНР-ни бинасында район администарцияны маданият ва туризм ишлеге къарайгъан бёлюгюню, баш китапхананы ва ЦТКНР-ни жаваплы къулулкъчуларыны гьаракаты ва ортакъчылыкъ этивю булан Дагъыстанны маданиятыны ва тиллерини гюнюне багъышланып, «Тил оьлсе, халкъ да оьле» деген баш булан чара оьтгерилди.

Оьтгерилген чарада эсгерилген идараланы ва бёлюклени ёлбашчылары ва жаваплы къуллукъчулары булан бирче Къарабудагъгент гимназияны ва 1 номерли орта школаны муаллимлери ва охувчулары оьзлени ортакъчылыгъын болдурдулар.

Оьтгерилген чараны юрютювчюлер – баш китапханачы Азинат Пашаева ва гимназияны муаллими Айгьанат Арсланбекова – оьзлени сёйлевюлеринде кёп миллетли Дагъыстан уьлкебизни халкъларыны тарихи, адабияты ва маданияты гьакъда мекенли кюйде маълуматлар берген сонг, Къарабудагъгент юртну тарихи гьакъда да баянлыкълар бердилер.

Дагъыстанны маданиятыны ва тиллерини гюнюне багъышлангъан чарада районну жамият палатасыны ёлбашчысы Абдулгьамит Мамагишиев оьзюню ортакъчылыгъын болдурду ва ана тилине, ата юртуна абур этмеге тарыкълыгъын ташдырды.

Чараны барышында А.Къаплановну атындагъы хорну ёлбашчысы Аскендер Исрапилов ва йырав Гилянханым Агьматова къумукъ тилде оьзлени йырларын къаравчулагъа савгъат этдитлер.

Къарабудагъгент районну социал ва яшёрюмлени масъалаларына къарайгъан бёлюгюню ёлбашчысы Гюлжанат Темирова, маданият ва туризм ишлеге къарайгъан бёлюгюню ёлбашчысы Найида Мурзаева, «Районну яшаву» баш редакторуну орунбасары, шаир ва журналист Багьавутдин Самадов ана тилни билмекни, уьйренмекни, аямакъны ва таза кюйде сакъламакъны гьакъында айтгъан сонг, къумукъ тилде оьзлени шиъруларын чебер кюйде охудулар.

Чараны ахырында ону ортакъчылары эсделикге кёп санавда суратлар чыгъардылар.

Багьавутдин