Кёп сюеген ишине берилип...

Бир ишни гьамангъа оьзю­не касбу этмек –дагъы да къыйын. Неге тюгюл гьар яш – муаллим чечме герекли сырлы дюнья. Клас ёлбашчы болмакъ учун охувчулагъа бакъгъан сюювден толгъан эркин юрек герек. Шолай юрекли адамлар бизин муаллимлени арасында да аз тюгюл. Шолардан бириси – Гимназияны 7-нчи «а» класыны клас ёлбашчысы Гьажиева Жамиля Набиюллаевна. Бу класны охувчулары учун Жамиля Набиюллаевна оланы клас ёлбашчысы болмакълыкъ – уллу сююнч, неге тюгюл ол яшланы тарбиялавгъа савлай берилген адам.

Жамиля Гьажиева яшлар учун оьзю уьлгю де дюр, насигьатчы да. Ол ёлбашчылыкъ этеген клас уьлгюлю класлардан бириси деп гьисаплана. 7-нчи «а» класны охувчулары охув ва тарбия якъдан макъталып юрюй. Жамиля Набиюллаевна класындагъы яшларда Ватангъа сюювню, эдеп-къылыкъны, охувгъа иштагьлыкъны тарбияламагъа бажаргъан, оьз элини герти ватандашларын болдургъан. Ону охувчулары тюрлю кружокларда, юрт ва район оьлчевде оьтгерилеген олимпиадаларда ва тюрлю чараларда да ортакъчылыкъ эте. Жамиля Набиюллаевна охувчуларыны ата-аналар булан да ювукъ бавлавлукъ юрюте.

Жамиля Гьажиева айтгъанлай: «Муаллим болуп ишлейгеним 34 йыл бола. Иш башлагъанлы клас ёлбашчы да дюрмен, классыз ишлеп де билмес эдим. Бир уллу агьлюбюз деп гьисаплайман. Класымдагъы яшланы оьз яшларым йимик сюемен, неге тюгюл гюнюмню кёп яны олар булан оьте, оланы хасиятларын билемен, кёп тюрлю темалагъа лакъыр юрютебиз»,-дей.

Оьтген муаллимлени гюню булан къутлай туруп, биз гележекде Жамиля Набиюллаевнагъа ва бары да муаллимлеге къатты савлукъ, бажарывлулукъ, жагьлыкъ, ишинде уьстюнлюклер ёрайбыз.

Ругьаният Мусаева, муаллим, Къарабудагъгент Гимназия