«Юрегибиз булан эшитебиз»

Чараны аслу мурады – охувчуланы бир-биревге яхшы, эдепли, рагьмулу, айланадагъылагъа янашывлу къайдада тарбияламакъ эди. Ёлугъувну барышында район администрацияны маданият ва туризм бёлюгюню ёлбашчысы Найида Мурзаева сёйледи. Ол оьзюню сёйлевюнде: «Гьар йыл сентябр айны ахырынчы къаттыгюнюнде Сангыравланы халкъара гюню белгилене. Бу йыл шо гюн 26-нчы сентябрге рас гелди. Биз бары да тюрлю авазланы эшитебиз, табиатны тербенишин гьис этебиз, айланадагъы аривлюклени гёребиз, сувланы, шаршарланы агъымын гёрюп-эшитип сююнебиз… Тек бизин арабызда шо яхшылыкълардан магьрюм яшайгъанлар да бар. Олар я макъамланы, я адамланы тавушун, демек табиатны бир тавушун да эшитмей. Шолай адамланы якъламакъ муратда Сангыравланы халкъара гюню белгилене»,-дей.

Сонг охувчулар врач-оториноларинголог Ирисбат Расулованы сёйлевюне тынглады. Ол сангырав ва осал эшитегенлени санаву кёп экенни айтды. «Планетада гьар 9-нчу адам яман эшите. Дюньяда 30 миллиондан да къолай адам шо аврувдан авруй. Россияда шо санавну 40 проценти осал эшите яда сангырав деп айтма ярай, шо 12 миллион адам болуп токътай, шоланы 5 проценти яшлар»,-дей ол.

Чараны барышында охувчулагъа гёзлерин де ябып, къоллары булан къулакъларын да бегитип, токътама таклиф этилди. Таклифни аслу мурады – яшлагъа эшитмейген ва гёрмейген адамланы яшавун сездирмек эди.

Китапхананы баш китапханачысы Азинат Пашаева байрамны тарихи гьакъда хабарлады. Оьзюню сёйлевюнде ол сангыравлагъа яшавда бек къыйын, олагъа айланадагъыланы якълаву ва рагьмулулугъу бек тарыкъ экенни айтды. Олай да, сёйлевюн узата туруп, баш кит апханачы гиччиден берли сангырав, тек оьзлени пагьмулары ва гьаракаты булан савлай дюньягъа белгили болгъан адамланы атларын уллу гьюрмет булан эсгерди. Демек, охувчулар тувмадан сангырав болгъан белгили адамлар булан таныш болду.

Сонг охувчулар: «Рагьмулукъ деген не затдыр?», «Яхшы болма рагьатмы?», «Яманлыкъ деген не затдыр?» деген соравлагъа жаваплар бердилер, рагьмулулукъ гьакъда оьзлер эшитген айтывланы айтдылар.

Чара «Быть добрым – это значит…» деген сорав-оюн булан тамамланды.

Нюрсагьадат