Меню
16+

Сетевое издание «Будни района»

01.10.2021 10:02 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Пагьмусун аян этген

Автор: Нюрсагьадат Изамутдинова

Белгили кюйде, октябр айны 5-нде Россияда Муаллимни гюню белгилене. Муаллимлик касбу яшавда инг де тарыкълы ва аслу касбулардан бириси. Неге тюгюл де бир затны да билмейген гиччипавланы алып, оланы охума, язма, ойлашма, оьзлени тутма уьйретмек рагьат иш тюгюл. Сонг да шо бир гюнлюк яда бир йыллыкъ иш де тюгюл. 11 йылны узагъында яшгъа билим де, тарбия да берип, оланы тюз ёлгъа салып, уллу яшавгъа гьазирлеп чыгъарагъан адам – муаллим.

Муаллимни касбусу енгиллеринден саналмаса да, касбуну танглап, ону кёп сююп, ишине амин болуп ишлейген муаллимлер арабызда кёп бар.

Шоланы арасында жагьил муаллимлер де бары бизин сююндюрмей болмай.

Шолай муаллимлени бириси – Алхасова Райсат Мурадовна Къарабудагъгент 2 номерли орта школада тарих дарсланы юрюте.

Райсат Алхасова муаллим касбуну кёп сююп танглагъан. Ол гиччиден берли тарих дарсны кёп сюе болгъан ва уллу болгъанда тарихчи болма ойлашгъан. Школада ишлейгени аз бола буса да, Райсат Алхасова ­оьзюню гьаракатын, пагьмуларын айланадагъылагъа аян этген.

2020-нчы йылда Р.Алхасова «Учитель года – 2020» деген конкурсда ортакъчылыкъ этип, оьзюню педагогика усталыгъын гёрсетмеге бажаргъан. Касбу пагьмуларын, терен билимлерин гёрсетме бажаргъан Райсат Алхасова 2-нчи ерни къазангъан. Ол ­оьзюню дарсларында гьар охувчугъа гёре янашып, сынавун артдырып, билимлерини сан янын оьсдюрюп юрюй. Ол охувчулагъа оьзюню билимлерин етишдирме, оланы тарихни сюйдюрмеге гьаракат эте.

Райсат Алхасованы охувчулары район ва республика оьлчевде оьтгерилеген олимпиадаларда, конкурсларда актив кюйде ортакъчылыкъ эте ва алдынлы ерлени алма бажара. Къайсы ишни башласа да, Райсатны пагьмусу, яратывчулукъ гьаракаты арагъа чыгъа. Гьар дарсны янгы къайдагъа къуруп, къужурлу оьтгермеге бажарагъан жагьил муаллимни дарсларын охувчулар чыдамсыз къаравуллай ва кёп сююп бара.

Райсат Алхасовагъа биз гележекде ишинде уьстюнлюклер ёрайбыз.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

4