Меню
16+

Сетевое издание «Будни района»

01.10.2021 11:35 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Газны масъаласы

Автор: Багьавутдин Самадов

Адатлангъан кюйде, оьтген талатгюн, сентябр айны 28-нде, район администрацияны жыйынлар оьтгерилеген уллу залында районну администрациясыны аппаратыны гезикли генгеши оьтгерилди. Генгешни ишинде район администрацияны управлениелерини ва бёлюклерини ёлбашчылары булан бирче районну ичиндеги юртланы башчылары да оьзлени ортакъчылыгъын болдурдулар.

Генгешни ачгъан ва юрютген районну башчысы Магь­мут Амиралиев районну яшавлукъ-коммунал хозяйство ва капитал къурулуш управлениесини ёлбашчысыны орунбасары Магьаммат Абусайитовну трибунагъа чакъырды ва яшавлукъ уьйлени газлашдырыв хас программа (догазификация) гьакъда маълуматлар бермеге таклиф этди.

Трибунагъа гётерилген М.Абу­сайитов оьзюню сёйлевюнде РФ-ни Президенти Владимир Путинни газлашдырыв социал хас программасы гьакъда мекенли кюйде англатыв берди.

Демек, ДР-ни энергетика ва яшавлукъ-коммунал министерлигинден Къарабудагъгент районну администрациясыны атына яшавлукъ уьйлени газлашдырыв гьакъда маълумат бермек учун хас кагъыз гелген. Шо кагъызгъа гёре районну ичиндеги юртларда иш осал юрюлегенин ол яшырмады.

«Газлашдырылмагъа тарыкълы яшавлукъ уьйлени умуми санаву савлай районда 3448 бар. Амма бугюнге газлашдырыв арза ­янгыз Уллубийавулдан гелген. Олар да 3 яшавлукъ уьйню газлашдырмагъа тарыкъ деп маълуматлар берген.

Социал газлашдырыв хас программа гьакъда (догазификация) районну халкъына «Районну яшаву» газетни бетлеринден маълуматлар берилген. Олай да, юртларда газлашдырыв масъала гьакъда хас штаблар къурулгъан. Шо штаблагъа газ къуллукъланы къуллукъчулары ва юртланы активистлери гирген», — деп эсгерди оьзюню сёйлевюнде районну яшавлукъ-коммунал хозяйство ва капитал къурулуш управлениесини ёлбашчысыны орунбасары Магьаммат Абусайитов.

Гётерилген масъалагъа гёре, районну гьакимбашы Магьмут Амиралиев оьзюню ойларын айтды ва таклифлерин берди.

- Социал газлашдырыв (догазификация) проект – районну ичиндеги юртларда бар бугюнлерде адамлар яшап турагъан янгы микрорайонланы газ булан таъмин этив масъаланы уьстюнлю чечмеге болагъан иш.

Шо ишни мекенли ва уьстюнлю чечмек учун районну ичиндеги юртланы башчылары бек белсенип ишлемеге тарыкъ. Айтагъаным, адамлар яшайгъан уьйлеге хас документлер этмеге герек. Демек, топуракъгъа ва уьйге хас документлер (зелёнка) онгарылмагъа тарыкъ.

Мен оьрде эсгерген социал газлашдырыв программа, РФ-ни Президенти Владимир Путинни буйругъуна гёре, 2 йылны узагъында оьтгерилмеге ва яшавгъа чыгъарылмагъа тарыкъ.

Газлашдырыв социал программагъа гёре, бизин анадаш районубузда 3500-ге ювукъ яшавлукъ уьйге гьавайын газ тартылмагъа имканлыкъ бар. Ачыкълашдырып айтсакъ, газ быргъылар, эсгерилген программагъа гёре, яшавлукъ уьйню топурагъыны дазусуна ерли тартылмагъа тарыкъ. Шо нечакъы бола буса да бизин районубузну халкъы учун оьтесиз пайдалы ва тарыкълы иш.

Шо саялы да, социал газлашдырыв программаны районубузну ичинде уьстюнлю кюйде яшавгъа чыгъармакъ учун районну ичиндеги бары да юртланы башчыларына, айсенилик этмейли, жаваплы кюйде янашмагъа тапшураман,- деди оьзюню сёйлевюнде М.Амиралиев.

Олай да, генгешни барышында районну башчысы М.Амиралиев бирдагъы керен вакцина этивню масъаласын гётерди. Демек, юртланы башчыларына, район ва юрт Жыйынланы депутатларына, халкъны арасында абурлу тамазалагъа вакцина этивню гьакъында генг кюйде англатыв иш юрютмеге тапшурду.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

3