“ВПН – 2020”

Район администрацияны жыйынлар оьтгерилеген уллу залында 26-нчы январда районну администрациясыны гезикли генгеши оьт­герилди. Генгешни ишинде район администрацияны жаваплы къуллукъчулары булан бирче юртланы башчылары да оьзлени ортакъчылыгъын болдурду.

Генгешни ачгъан ва юрютген районну башчысы Магьмут Амиралиев генгешни аввалында вакцина этмекни гьакъында районну жамиятына чакъырыв этди. Демек, инг башлап адамлар оьзлени анализлерин бермеге тарыкъ, сонг буса вакцина этилмеге герек. Районну халкъы вакцинаны этдирмек учун Къарабудагъгент район больницагъа гелмеге тарыкъ. Алимлер билдиреген кюйде, этилеген вакцинаны халкъны савлугъу учун къоркъунчлугъу ёкъ.

Сонг ол халкъны Бютюнроссия гьисапгъа алыв чара гьакъда баянлыкълар бермеге Дагъыстанстатны Къарабудагъгент район бёлюгюню ёлбашчысы Нажмугьуда Гьасановну трибунагъа чакъырды.

Трибунагъа гётерилген Н.Гьасанов оьзюню сёйлевюнде халкъны Бютюн­россия гьисапгъа алыв чара гьакъда мекенли айта туруп, районну ичинде бугюнлерде 88774 адам яшайгъанлыгъын ва 16894 яшавлукъ уьй бар экенлигин ачыкълашдырды.

Н.Гьасановну сёзлерине гёре юртларда орамлагъа атлар берилген ва уьйлеге номер белгилер салынгъан. Болса да, шо ишни гьали де мекенли этмеге тарыкълыгъын англатды.

Дагъыстанстатны Къарабудагъгент район бёлюгюню ёлбашчысы эсгерген кюйде, шо чараны оьтгермек учун районда 27 инструктор ва 162 “переписчик” ишге къуршалажакъ. Шо чараны оьтгеривде районну ичиндеги юртланы башчылары оьзлени къошумун болдурмагъа борчлу.

Оьтгерилген генгешни гьасилин чыгъарып районну гьакимбашы Магьмут Амиралиев сёйледи ва оьзюню пикруларын ачыкъ этди. Демек, халкъны Бютюнроссия гьисапгъа алыв чарагъа муаллимлени къуршамакъны билим берив управлениеге тапшурду. Олай да, ол адрес хозяйстволаны тамамламагъа, инструкторлагъа ва “переписчиклеге” шо чараны оьтгермек учун шартлар яратмакъны тапшурду.