Меню
16+

Сетевое издание «Будни района»

29.01.2021 10:01 Пятница
Категории (2):
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Гьасиллер чыгъарылды

Автор: Багьавутдин Самадов

Январ айны 26-нда район администрацияны жыйынлар оьтгерилеген уллу залында социал сиясат управлениени табилигине гиреген идараланы ва къурумларыны жыйыны оьтгерилди. Жыйында 2020-нчы йылны гьасиллери чыгъарылды ва гележекде гёз алгъа тутулгъан муратлар гьакъда айтылды.

Жыйынны барышында район администрацияны башчысыны орунбасары Жалалутдин Жамалутдинов, социал сиясат управлениени ёлбашчысы Гюлжанат Темирова ва олай да районну ичиндеги юртлардагъы китапханаланы, маданият уьйлени ва ДЮСШ-лени ёлбашчылары ортакъчылыкъ этдилер.

Жыйында аслу докладчы гьисапда район администрацияны социал сиясат управлениени ёлбашчысы Г.Темирова сёйледи. Ол эсгерген кюйде, 2020-нчы йылны узагъында савлай элибизде коронавирус аврув яйылгъанына себепли болуп, бары да маданият идаралар, китапханалар ва музейлер онлайн режим ишге чыкъмагъа борчлу болдулар.

Демек, шо аврув яйылгъан вакътиге эсгерилген къурумланы къуллукъчулары оьзлени ишин халкъгъа интернет байлавлугъундан таба гёрсете эди ва халкъны шо ишге къуршамагъа бажардылар.

“«Маданият» деген милли проектге гёре 2020-нчы йылны ичинде Дёргели ва Къакъашура юртларыны маданият уьйлерине капитал ремонт этилди ва Къурбуки юртну маданият уьюне ремонт ишлер этилди. Шолай ишлер 2021-нчи йылда да узатылмагъа гёз алгъа тутула”,- деди Г.Темирова оьзюню сёйлевюнде.

Олай да, Г.Темирова эсгерген кюйде, маданият къуллукъчулар халкъны ругь ва патриот талапларын яшавгъа чыгъармакъ муратда бир къадар иш эте.

Район администрацияны башчысын орунбасары Жалалутдин Жамалутдинов районну башчысы Магьмут Амиралиевни атындан маданият ва спорт идараланы къуллукъчуларына баракалла кагъызлар тапшура туруп, олар коронавирус аврувгъа да къарамайлы, оьзлени борчун ва ишин намуслу ва уьстюнлю кюйде кютгенин аян этди.

Энниден сонг да олагъа районну администрациясы алдына салгъан борчланы ва талапланы тийишли ва оьр даражада кютежегине инанабыз.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

4