Инамлы кюйде алгъа абат алабыз!
1921-нчи йылны январ айыны 20-нда Бютюнсоюз Баш исполнительный комитетни хас декрети булан Дагъыстан Автоном Совет Социалист республикасы къурулгъан. Шо агьвалат 1920-нчы йылны ноябр айыны 13-14-нде Темирхан-Шура шагьарда оьтгерилген Дагъыстанны халкъларыны 1-нчи съездинде къабул этилген къараргъа гёре кюрчюленген.
Шоллукъда, гьалиден 100 йыл алда бизин Дагъыстан уьлкебиз оьзюню айрыча автономиясын къургъан ва халкъыбыз оьзюню къысматын Россия булан байлагъан. Озокъда, бу ерде шо тарих ва терен маънасы бар агьвалатны тюбюне гирип айлангъан ва Дагъыстанны оьсювюне кюрчю салгъан бизин къумукъ уланыбыз Жалалутдин Къоркъмасовну атын оьктем кюйде эсгермеге борчлубуз.
1921-1931-нчи йылланы боюнда Жалалутдин Къоркъмасов Дагъыстанны бары да тармакъларыны оьсювюне оьзюню билимин ва гьаракатын болдургъан. Олай да, Ж. Къоркъмасовну гьаракаты булан Дагъыстанны майданыны оьлчевю 27 минг квадрат километрден 50 мингге артгъан.
Бугюнлерде Дагъыстан Россияны лап да гюнтувуш региону ва тыш пачалыкълар булан дазу тута, юрт хозяйство ва промышленност, туризм ва далапчылыкъ тармакъларда ал сыдраларда юрюй. Бизин уьлкебизде дослукъда ва татывлукъда 40-гъа ювукъ тюрлю миллет яшай.
Дагъыстандан чыкъгъан белгили жамият чалышывчуларыбызны, игитлерибизни, шаирлерибизни, спортчуларыбызны атлары савлай элибизге ва гьатта дюньягъа малим болгъанлыгъына оьктем болабыз.
Шоллукъда, алдагъы гюн, 20-нчы январда, Дагъыстан АССР къурулгъанлы 100 йыл битегенликге байлавлу болуп, республикабызны тахшагьары Магьачкъалада уллу байрам чаралар оьтгерилди.
Шо чараланы барышында РФ-ни Президентини СКФО-дагъы толу ихтиярлы вакили Юрий Чайка, РФ-ни Администрациясыны ёлбашчысыны орунбасары Магьамматсалам Магьамматов, РФ-ни Федерациясыны Советини вакиллери, РФ-ни пачалыкъ Думасыны депутатлары, ДР-ни ёлбашчылары, ДР-ни Халкъ Жыйыныны депутатлары, ДР-ни шагьарларыны ва районларыны ёлбашчылары, бары да динлени вакиллери, жамият чалышывчулар ва кёп санавдагъы гьюрметли къонакълар оьзлени ортакъчылыгъын болдурдулар.
Инг башлап, байрам ва шатлы чаралар Каспийск шагьардагъы А.Алиевни аты къоюлгъан спорткомплексде башланды. Шону барышында РФ-ни Президентини СКФО-дагъы толу ихтиярлы вакили Юрий Чайка РФ-ни Президенти Владимир Путинни ва оьзюню атындан Дагъыстанны халкъын ДАССР къурулгъанлы 100 йыл битегенлиги булан къутлады, ерли халкъгъа гележекде дагъы да уьстюнлюклер ёрады.
Сонг байрам чара Магьачкъаладагъы Дослукъну Уьюнде узатылды. Онда Дагъыстанны Башчысыны заманлыкъгъа борчларын кютеген Сергей Меликов Дагъыстанны оьсювюне къошумун болдургъан белгили адамлагъа пачалыкъ савгъатлар тапшурду.
Эсгерилген шатлыкъларда Къарабудагъгент районну вакиллери де ортакъчылыкъ этдилер.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
