Гьал ёрукълашгъан

Генгешде районну башчысы ­Магьмут Амиралиев булан бирче штабны уьюрлери – район администрацияны аппаратыны ёлбашчысы Жамалутдин Имакъов, Роспотребнадзорну Къарабудагъгент райондагъы бёлюгюню ёлбашчысы Омар Абачараев, Къарабудагъгент ЦРБ-ни баш врачы Расул Гьиравов, районну билим берив управлениесини ёлбашчысы Тажли Хизриева, район администрацияны экономика бёлюгюню ёлбашчысы Фархат Магьмутов ва оьзге жаваплы къуллукъчулар ортакъчылыкъ этдилер.

Штабны уьюрлери булан саламлашгъан сонг, районну гьакимбашы М.Амиралиев Роспотребнадзорну бёлюгюню ёлбашчысы О. Абачараевге ва Къарабудагъгент ЦРБ-ни баш врачы Р. Гьиравовгъа районну ичинде коронавирус аврув булангъы гьалны гьакъында баянлыкълар бермеге таклиф этди.

О. Абачараевни сёзлерине гёре, коронавирус аврув булангъы гьал районда бугюнлерде ёрукълашгъан, тек гьали де парахат болмагъа тюшмей. Демек, аврувну алдын алмакъ учун гёрюлеген чараланы ол дагъы да узатмагъа таклиф этди.

Р. Гьиравов буса оьзюню сёзюнде ПЦР-тестлер юрюлегенни ва дарманлар тарыкъ чакъы бар экенлигин айтды. Олай да, ол больница байрам ва ял алагъан гюнлерде де тийишли кюйде ишлегенин аян этди. Ол да оьзюню сёзюн, къабул этилген чараланы узатмагъа чакъыра туруп, тамамлады.

Оьтгерилген генгешни вакътисинде районну башчысы М. Амиралиев, районну билим берив управлениесини ёлбашчысы Т. Хизриевагъа школалар учун алынгъан рециркуляторланы ерлешдирмеге тапшургъан сонг, район администрацияны экономика бёлюгюню ёлбашчысы Ф.Магьмутовгъа иш гюплер булан тюкенлеге ва оьзге сатыв-алыв ерлеге тергев болдурмагъа буюрду.

Демек, шо тергевлени вакътисинде аслу гьалда Роспотребнадзорну талапларын якъламакъны чакъырды. Шолагъа къаршылыкъ билдирегенлеге къодулар салмакъны ва оланы жавапгъа тартмакъны таклиф этди. Штабны генгешини ахырында районну гьакимбашы Магьмут Амиралиев 65 йылдан оьмюрю уллуланы дагъы да 2 жумагъа уьйде турмагъа чакъырды, адамлар кёп жыйылагъан ерлерде, жамият транспортда, сатыв-алыв юрюлеген тюкенлерде ва иш ерлерде маска режимни сакъламагъа, аврув кёп ­яйылгъан районну ичиндеги юртларда дезинфекция ­оьтгермеге тапшурду.