Налогланы толувуна багьа берилди

Оьтгерилген генгешни ачгъан ва юрютген районну башчысы Магьмут Амиралиев районну бюджетини налогларыны умуми толуву гьакъда маълуматлар бермеге трибунагъа район администрацияны башчысыны орунбасары Сапиюлла Са­йитовну чакъырды.

С.Сайитов оьзюню сёйлевюнде эсгерген кюйде, районну бюджетини налог­лар жыйылывуну толуву- 99 процент. Демек, 1 миллион 149 минг манат акъча етишмей.

Ону маълуматларына гё­ре, НДФЛ ва УСН налог­лар артыкълыгъы булан толтурулгъан буса да, ЕНВД, ЕСХН, акцизлер, топуракъ ва мюлк налоглар тийишли кюйде толтурулмагъан.

С.Сайитов айтагъан кюйде, районну бюджетини гелими – 102 процент, амма юртланы бюджетлерини умуми толуву 82 процент тута. Олай да, ол оьзюню сёйлевюнде районну бюджетини умуми борчу гьакъда айтды. Демек, шо – 59 миллион 857 минг манат. Шону ичинде 32 миллион 800 минг манат – топуракъ ва 10 миллион манат – мюлк налоглар. Транспорт налог­ну къадары 263 миллион манатгъа тёбенлешгенин С.Сайитов аян этди.

Район администрацияны­ башчысыны орунбасары С.Сайитов оьзюню сёйлевюнде 6 минг 200-ден ­артыкъ суд буйрукъ къабул этилгенин ва шоланы 3 мингден къолайы къаралгъанын ачыкълашдырды. Ярашывлукъ судгъа йиберилген 39 материалгъа гёре 3 миллион манат къоду алынгъанын эсгерди.

Оьзюню сёйлевюню ахырында С.Сайитов регистрация этилмейли оьзбашына иш гёреген 215 адам аян болгъанлыгъын ва оланы 113-чю регистрация этилгенин англатды. Олай да, С.Сайитов эсгерген кюйде, бары да налогланы къадары гюн сайын кемий.

Генгешни барышында сёйлеген 14 номерли ФНС-ни районара инспекция бёлюгюню ёлбашчысыны орунбасары Магьаммат Тидуллаев эсгерген кюйде, умуми бюджетни толуву – 101 процент. Аслу гьалда НДФЛ ва УСН налоглар тийишли даражада ва артыкъ кюйде толтурулгъан. Ол да транспорт, топуракъ ва мюлк налогланы гьайында къалып жыймагъа тарыкълыгъын ташдырды.

М.Тидуллаев оьзюню сёйлевюнде гьар тюрлю къуллукълардан къурулгъан рейд бригадаланы ишин давам этмекни таклиф этди. Демек, алъякъда гюнню узагъында 40-50 минг манат жыйыла эди буса, гьали 160 минг манатдан артыкъ жыйыла. Сонг да, сентябр айны 1-нден башлап, 15 айны узагъында оьзбашына иш гёреген далапчылар (ИП) оьзлени ишин юрютмесе, налог инспекция шоланы япмагъа ихтияры бар экенлигин аян этди. Шо буса далапчылар учун уллу енгиллик экенин эсге салды.

Генгешде ОМВД-ни ОВМ бёлюгюню ёлбашчысыны борчларын кютеген Завур Имакъов ва суд приставланы район бёлюгюню ёлбашчысы Руслан Биймурзаев сёйледилер.

Генгешни барышында гётерилген аслу масъалагъа гёре, районну башчысы Магьмут Амиралиев оьзюню таклифлерин берди ва ойларын айтды.

Масала, районну башчысы транспорт, топуракъ ва мюлк налогланы гьар кимни атлары булангъы сиягьларын (списки) гьазир этмеге ва юртланы башчыларына халкъгъа шоланы гьакъында англатыв иш юрютмеге тапшурду.

М.Амиралиев налог, суд пристав, РОВД ва ярашывлукъ судланы къуллукъчуларына бары да налогланы жыйывда оьзлени гьаракатын болдурмакъны таклиф этди. Озокъда, рейд бригадаланы ишин узатмакъны районну башчысы арив гёрдю ва якълады.

Районну башчысы жыйыл­гъан транспорт налог районну ичиндеги юртлагъа къайтарылагъанын ва шо харжгъа юртларда орамлар ва ёллар онгарылагъанын бир де унутмагъа ярамайгъанын айтды.

М.Амиралиев РОВД-ни къуллукъчуларына жамият транспортда маска режимни гючлендирмеге ва шону гьайында турмагъа буюрду. Гьатта шо режимни бузагъанлагъа къоду (штраф) салмакъны таклиф этди.

Оьзюню сёзюн тамамлай туруп, районну башчысы М.Амиралиев юртланы ичиндеги санитар гьалны гьакъында баянлыкълар берди. Демек, юртларда санитар гьал ва тазалыкъ бек осал даражада экенлигин айта туруп, юртланы башчыларына шо гьалны бир айны ичинде яхшылашдырмагъа буюрду.