Гьаракаты гёрмекли

Оьзюню гьакъында бугюн сёйленежек Мустапаева Солтанат Гьюсейновна – Къара­будагъгент районну Агъачавул юртундагъы школада ишлейген шолай макътавгъа лайыкълы муаллимлени бириси.

Солтанат Мустапаева 1997-нчи йыл ДГПИ-ни тарих факультетин битдирген. Башлап ол 2 йыл школада пионервожатый болуп ишлей, сонг тарих дарсланы муаллими болуп ишин узата.

С.Мустапаева теория ва практика якъдан яхшы гьазирлиги булангъы муаллим, дарслагъа мекенли гьазирлене, краевед материалланы къуршай. Оьзюню дарсларында ол янгы технологияланы генг кюйде къоллай. Оьтгерилеген дарсларына С. Мустапаева яратывчулукъ булан янаша пачалыкъ архивге илму центр­гъа барып, тюрлю къолъязыв материаллар жыйып. Агъачавул юртну тарихи гьакъда бек уллу ва маъналы материал онгарып, оьзюню дарсларында, дарсдан тышдагъы чараларында къоллай.

С.Мустапаева дарслары къужурлу болсун учун, оланы семинар, лекция, зачёт, тест къайдаларда оьтгере.

Солтанат Гьюсейновна дарсдан тышдагъы чаралагъа да аслу тергевюн бакъдыра. Олар охувчуланы тарбиясына яхшы къошумлукъ этегенине инана. Тарих дарсланы айлыгъында Солтанат Гьюсейновна ачыкъ дарслар, тюрлю-тюрлю чаралар, оланы арасында район оьлчевдегилерин де оьтгере.

Солтаният Мустапаевна оьзюню ишине ва охувчуларыны билимлерине бек талаплы. Билимлери осал ва пагьмулу охувчулар булан ол айрыча иш юрюте. Школа ва район олимпиадаларда ону охувчулары алдынлы ерлени ала. Олай да, С.Мустапаева охутагъан яшлар тюрлю конкурсларда да ортакъчылыгъы булан оьзлени билимлерин аян этген.

Охувчуланы, оланы ата-аналарыны, муаллимлени арасында Солтанат Гьюсейновна абур къазангъан.

Шо абурну ва гьюрметни къазанмакъ учун муаллим С.Мустапаева гечесин-гюнюн бир этип чалыша. Охувчулар тарих дарсланы сюйсюн ва билсин учун бары да гючюн сала.

Полицияны майору Гьабил Гьабиловну аты къоюлгъан Агъачавул орта школаны муаллим коллективи Солтанат Гьюсейновнаны етишип гелеген Муаллимни гюню булан къутлай, огъар савлукъ, гележекде ишинде яратывчулукъ уьстюн­люклер ёрай.