Меню
16+

Сетевое издание «Будни района»

07.08.2020 09:53 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Республикада экинчи ердебиз

Автор: Шихав Къайирбеков

Артдагъы йылларда бизин районда 10-лар булан федерал, республика программалар ва проектлер яшавгъа гийириле. Шоланы арасында «Демография», «Культура», «Образование» деген милли проектлени, шолар булан янаша – «Мои дороги», «Моя вода», «Комфортная городская среда» деген регион проектлени айрыча эсгерме ярай. Шо программалагъа, проектлеге гёре ерлерде социал объектлер къурула, школалагъа, яшлар бавларына ремонтлар этиле, янгылары къурула, маданият уьйлер янгыртыла.

«Комфортная городская среда» деген программа булан 2019-нчу йылда районну юртларында ватандашлар ял алагъан бавланы, жамият ерлени безендиривде кёп ишлер этилген. Юртларыбыз, юртланы орамлары гюн сайын тюрлене, гёзеллеше.

2019-нчу йыл (СМП гьисапсыз) къурумланы аслу капиталына 4 миллиард 234,5 миллион инвестиция харжлар гелген. Къарабудагъгент районгъа гелген инвестиция харжланы къадары 2018-нчи йыл булан тенглешдиргенде 147 процентге артгъан. Гьакъыкъатда бизин район инвестицияланы къадарына гёре республикада 2-нчи ерде. Биринчи ерде – Магьачкъала.

Эсгерме тарыкъ: районну башчысы Магьмут Амиралиев районну территориясында яшавгъа чыгъарылагъан программаланы, проектлени яшавгъа чыгъывуна оьзю тергев эте.

Август айны 4-нде район администрацияда районну башчысы М.Амиралиевни, ону 1-нчи орунбасарларыны, администрацияны бёлюклерини ёлбашчыларыны, юрт­ланы башчыларыны, райцентрдагъы къурумланы, идараланы ёлбашчыларыны ортакъчылыкъ этивю булан гезикли жумалыкъ жыйын оьтдю.

Жыйынны юрюте туруп, районну башчысы М.Амиралиев булай деди;

-2020-нчы йылыбыз да эниш болма башлады. Бу йыл федерал, республика милли проектлеге къошулуп зор ишлер этме гёз алгъа тутгъанбыз. Амма барыбызгъа да белгили болгъаны йимик, коронавирус инфекция аврувну яйылывуну къоркъунч­лугъу себеп болуп, эки ай карантин билдирилди. Районну ичинде этилеген ишлер бютюнлей токътап къалмаса да, юрюлеген ишлени барышы хыйлы асталашды.

Гьали коронавирусну къоркъунчлугъу тая бара. Шо саялы 2020-нчы йылда районну ичинде этилме герекли проектлер, программалар, къурулагъан объект токъташдырылгъан болжалларда пайдаландырывгъа берилме тарыкъ.

Барыбыз да билеген кюйде, районну территориясында этилеген ишлер аз тюгюл. Шо саялы йылны къалгъан вакътисинде барыбызгъа да билеклерибизни чююрюп, белбюгюп, бары да проектлени, къурулушланы гёрсетилген болжалларда пайдаландырывгъа бермек учун белсенип ишлеме тарыкъбыз.

Районну территориясында яшавгъа чыгъарылагъан проектлени, программаланы гьакъында районну башчысыны 1-нчи орунбасары Ибрагьим Абдулмежитов мекенли маълуматлар берди.

Ол оьзюню сёйлевюнде «Мени Дагъыстаным – мени ёлларым», «Комфортная городская среда», «Мой Дагестан – моя вода» ва оьзге проектлер булан этилип турагъан ишлени барышын суратлады. И.Абдулмежитов сёйлевюн узата туруп, Къара­будагъгент, Дёргели, Губден зонада къурулуп турагъан яшлар бавларыны къурувну графигин аянлашдырды. Артдагъы ай ярымны ичинде ишлени темплери мекенли чалтлашгъанны аян этди.

И.Абдулмежитов «100 школа» программа булан районну школаларында юрюлюп турагъан ишлени уьстюнде токътап сёйледи. Ол оьзюню сёйлевюнде шо проектни яшавгъа чыгъармакъ учун гёрсетилген акъча маяланы залдагъылагъа ачыкъ этди.

И.Абдулмежитов оьзюню сёйлевюнде районну ватандашларын ичеген таза сув булан таъмин этивде этилип турагъан, 2021-нчи йылда этме гёз алгъа тутулгъан проектлени эсгерди. Ол пандемияны четимликлерине де бойсынмай подрядчиклер пайдаландырывгъа берилме герекли объектлер заманында берилежегин ташдырды.

Чарада гьасил чыгъарып сёйлей туруп, районну башчысы М.Амиралиев районну территориясында гьар тюрлю программалагъа гёре кёп ишлер этилегенни эсгерди. Шолар барысы да ватандашлагъа арив ял алмакъ, яшав даражасына онгайлыкъ­лар, енгилликлер болдурмакъ учун этилеген ишлер.

Оьзюню сёйлевюнде районну башчысы М.Ами­ралиев юртланы башчыларын, район администрацияны жаваплы къуллукъчуларын, райцентрдагъы къурумланы ёлбашчыларын РФ-ни Президенти В. Путинни, ДР-ни башчысы В. Васильевни сиптеси булан арагъа чыкъгъан федерал, регионал программаланы, проектлени яшавгъа чыгъармакъ муратда гьар гюн жавапчылыкъны гьис этип ишлеме чакъырды.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

3