Мол тюшюмлер гёрюне
«Язбашны бир гюню йыл ашатар» деген халкъ айтыву девюрлер булан сыналгъан терен маъналы айтыв юрт хозяйствону бары да тармакъларында чалышагъан ёлдашлагъа багъышлангъан болма ярай. Неге десегиз, авлакъчылар, овошчулар, юзюмчюлер, бавчулар ва оьзге тармакъланы къуллукъчулары йыл боюнда тёкген къайратлы загьматны жамы яйны артына, гюзню башына чыгъарылма башлай. Муна шо заманлар етишген. Авлакъчыларыбыз беженлерин берекетден толтуруп парахат болгъан. Йыл нечакъы авур, къургъакъ гелсе де, ашлыкъ оьсдюрювчюлерибизни гьасиллер къуванчлы болду. 2020-нчы йылны тюшюмю учун чачылгъан 14199 гектар ердеги гюзлюк-язлыкъ къылчыкълы ашлыкъланы гьар гектарындан 22,1 центрнер тюшюм алынып, беженлеге 31426 тон ашлыкъ тёгюлген,
Овошчуларыбыз, бавчуларыбыз, юзюмчюлерибиз учун бугюнлер инг жаваплы ва къыставлу вакъти. Авлакъ ниъматланы тюшюмю районда массовый кюйде къайтарылма башлагъан.
Юзюмчюлюк тармакъ бизин районну экономикасында белгили ерни тута. Буссагьатгъы вакътиде районда юзюмлюклени майданы 2003 гектаргъа етген. Шо участкаланы 1226 гектары – планлы кюйде тюшюм береген юзюмлюклер. Дагъы да мекенлешдирип айтгъанда, районда бар юзюмлюклени 80 проценти – «Молдова» журасы, 5 проценти – техника жура, къалгъан 15 проценти эрте бишеген столовый жура.
Районну юзюмчюлери йылны боюнда борланы гьар-бир агротехника къуллукъларын макъталгъан болжалларда сан янлы кютген. Аврувланы, зиянлы жанланы алдын алыв чаралар да заманында оьтгерилгени гёрюне.
Юзюм гесивню барышы гьакъда айта туруп, районну юрт хозяйство управлениесини ёлбашчысы Шагьабутдин Мустапаев булай деди:
- Бу йыл районубузну юзюмчюлери 12 минг тондан да къолай гюнешни емишин жыйма къаст эте. Оьрде де эсгерип гетгени йимик, борланы гьар-бир къуллукълары мекенли кютюлгени тюеклердеги салкъынлардан да гёрюне. Юзюмню тюшюмю яман гёрюнмей.
Районда юзюмню эрте бишеген жураларын гесив, сатывгъа чыгъарыв башлангъан. Буссагьатгъы вакътиде районда 42 гектар майдандагъы юзюмлюклени тюшюмю къайтарылгъан. 433 тон юзюм жыйылгъан ва сатывгъа чыгъарылгъан. Гьар гектар гьалиге 103 центнер тюшюм бере.
Башлапгъы гектарланы юзюмюн жыйыв «Далап», оьзюне Зиявутдин Абдуллагьатов башчылыкъ этеген «Шанс» деген сабанчы-фермер агьлюлер де, У.Абужаев, А.Сайитов, М-р.Къайирбеков, М.Гьайдаров ёлдашлар да оьзлени участкаларындагъы юзюмню эрте бишеген жураларын жыйывгъа гиришгенлер.
Башлапгъы гьасиллер къуванчлы. Районда бар юзюмлюклерибизни 80 проценти «Молдова» экенни гьисапгъа алсакъ, молдованы тюшюмю хыйлы къолай гёрюне. Юзюмчюлерибизни натижалары дагъы да гёрмекли болма бола. Шолай болма насип болсун.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
