Масъалалар арагъа салынып ойлашылды

1. Къарабудагъгент районда коронавирус инфекция аврувну яйылывуну алдын алыв, аврувланы сав этив.

2.Дагъыстан республикада «Эфективный АПК» деген проектни кюрчюсюнде районда юзюмчюлюк, интенсивный бавчулукъ тармакъланы оьсдюрюв.

3. 2020-нчы йылда Къарабудагъгент районда муниципал мал-матагьны приватизация этивню планын тасдыкъ этив.

4. Къарабудагъгент район муниципал къурулувуну 2019-нчу йылгъа бюджетни толуву.

5. Район Жыйыныны депутатларыны 2020-нчы йылны бюджетине ва планлы 2021-2022-нчи йыллагъа къабул этген бюджетлеге алмашынывлар, толумлашывлар этив.

6. Район Жыйыныны депутатларыны 2005-нчи йылда Къарабудагъгент районну территориясында айрыча чалышыв юрютеген, далапчылыкъ чалышывда алагъан хайыр гелимлеге алмашынывлар этив.

7. Къарабудагъгент район муниципал къурулувуну тергев-гьисап палатасыны 2019-нчу йылгъы иш планыны яшавгъа чыгъыву.

8. «Къарабудагъгент район» муниципал къурулувну Уставына къошумлар, алмашынывлар этив.

Биринчи масъалагъа байлавлу Къарабудагъгент район муниципал къурулувуну башчысы Магьмут Амиралиев баянлыкъ берди. Ол оьзюню сёйлевюн булай башлады:

- Муна, эки ай сав дюнья пандемияны шартларында яшай. Шо болжалны ичинде дюньяда коронавирус инфекция аврув нечесе миллион адамгъа къабунгъан. Бу аврув себеп болуп, дюньяда оьлгенлени санаву да аз тюгюл.

Коронавирус инфекция аврувну яйылыву дюньяда давам этиле.

Бу аврув аянгъа чыкъгъандокъ, районда ону яйылывуну алдын алмакъ, авруйгъанланы сав этмек муратда оператив штаб къурулду. Ону уьюрлери гьисапда администрацияны вакиллери, савлукъ сакълав, ихтияр-якълав ва оьзге къурумланы жаваплы вакиллери къошулду. Къысгъа болжалны ичинде инфекция аврувну яйылывуну алдын алывгъа жаваплы къуллукъчулар белгиленди.

Коронавирус инфекция аврувну алдын алывгъа къабул этген план чараны яшавгъа чыгъара туруп, «Леззет» санаторийде 165 адамгъа ери булан обсервация ер гьазирленди. Шону 20 ери медицина къуллукъчулар саялы, май айны 28-нде «Леззет» санаторийни обсервациясындагъы бары да ватандашлар Россия Федерацияны регионларына, яшайгъан ерлерине гетди. Ондан къайры да, «Надежда» деген ял алагъан базада тарыкъ болуп къалса деп, обсервация учун 20 ер гьазирленген эди.

Районда коронавирус инфекция аврувну яйылывуну алдын алмакъ, авруйгъанланы сав этмек учун биринчи гюнден башлап жанлы иш юрюлдю. Башлап район больницаны инфекция бёлюгюнде авруйгъанлагъа ерлер гьазирленген эди. Гьалны гьисапгъа алып, 230 ер гьазирленди. Бугюнге больницада 140 койка ер бар. Тарыкъ болуп къалса деп, 120 ер къорукъда (резервде) сакълангъан. 100 койка ерге кислород аппарат къошулгъан. Буссагьатгъы вакътиде больницада сувукъ тийген (пневмония) диагноз булан ятгъан 117 адам бар. Шоланы 97-си коронавирус инфекция аврувгъа положительный тест берген.

Коронавирус инфекция аврув арагъа чыкъгъандан бу якъгъа районда 47 адам оьлген. Апрель айны 1-нден май айны 29-уна ерли 485 адам сав болгъан. 5161 адам тергевлерден (рентгенден) чыкъгъан, май айны 12-нден тутуп компьютер томограф ишлей, 411 адам тергелген. Больницада тарыкълы дарманлар, дезинфекция алатлар булан 100 процентге таъмин. 6 ИВЛ аппарат бар.

Роспотребнадзорну бизин районгъа къарайгъан бёлюгюню касбучулары 365 адамгъа 14 гюн «самоизоляцияда» турма тарыкъ деп къарар чыгъаргъан эди. 43 адамны «самоизоляция» болжалы битмеген.

Районну ич ишлер бёлюгюню къуллукъчулары береген далиллеге гёре, март айны 1-нден тутуп май айны 28-и болгъунча, районну территориясына 3637 адам гелген. Артдагъы 14 гюнню ичинде гелгенлени санаву – 161.

Бирдагъы керен такрарлайман, районда коронавирус инфекция аврувну яйылывуну алдын алывда Роспотребнадзорну бары да гёрсетивлерин яшавгъа чыгъарма чаралар гёрюлдю.

Райцентрны, юртланы хас орамлары тайышывсуз дезинфекция этилип турду.

Бу жумадан тутуп «Россияны МЧС-ни Ногинск къорув центрыны» касбучулары районда дезинфекция ишлер оьтгерип туралар.

Коронавирус инфекция аврувну яйылывуну алдын ала туруп, «Къарабудагъгент район» муниципал къурулувуну администрациясы юрт администрациялагъа ватандашлагъа тегин берсин деп, башлап 8 мингден де къолай маска берилди. 16 мингге ювукъ маска берилежек. Къорукъда (запас) 10 минг маска бар.

Коронавирус инфекция аврув арагъа чакъгъандан бу якъгъа ватандашланы яшав даражасы, агьлю бюджетини имканлыкълары хыйлы тёбенлешгени гьакъ.

Халкъына авур заманлар гелгенде эревюллю уланлар табулар деп, негьакъ айтмай. Бизин районда да шолай эревюллю уланларыбыз бар. Олар бек уллу рагьмулу иш этдилер. О гьакъда район газетни бетлеринде атлары эсгерилди, таман даражада маълуматлар язылды. Мен олагъа мени, районну халкъыны атындан гьакъ юрекден разилигимни билдиремен ва баракалла беремен.

Сессияда районну башчысы М.Амиралиев РФ-ни Президентини май айны 15-нде берген тапшурувун яшавгъа чыгъара туруп, районда коронавирус инфекция аврувну алдын алывда ортакъчылыкъ этеген бары да врачлагъа, орта медицина къуллукъчулагъа федерал бюджетден гёрсетилген ругьландырагъан акъча маялар апрель ай учун толу тёленип битгенин малим этди.

Сессияда 2,3 масъалалагъа байлавлу районну башчысыны биринчи орунбасары И.Абдулмежитович чыгъып сёйледи.

4,5,6 масъалалагъа байлавлу районну акъча ишлеге къарайгъан управлениесини ёлбашчысы А.Шагьманаев гьисап берди. 7-нчи масъалагъа гёре районну тергев-гьисап палатасыны председатели А.Айдиев баянлыкъ берди. 8-нчи масъалагъа байлавлу район Жыйыныны депутатларыны председателини орунбасары М.Вагьапов баянлыкъ берди.

Сессияда арагъа салынып къаралгъан масъалалагъа байлавлу тийишли къарарлар къабул этилди.