ДР-ни жаваплы къуллукъчулары бизин районда

Сонг ДР-ни жаваплы къуллукъчулары Россия Федерацияны аслу закону Конституциягъа алмашынывлар этивге тавуш берив районда нечик юрюлегенни билмек муратда райцентрны маданият къаласында ерлешген сайлав участкада да болдулар. Шо гюн участкада Конституциягъа алмашынывлар этивге болжалдан алда тавуш берив низамлы юрюлегенин, сайлав участка тарыкълы алатлар булан таъмин экенин гёрдюлер. Къонакълар райцентрдагъы кинозалгъа да гёз къаратдылар.

Район администрацияны жыйынлар оьтгерилеген залында ДР-ни Гьукуматыны председателини орунбасары А.Халиловну, ДР-ни мал-матагь еслигини министри А.Къагьиргьажиевни ва районну башчысы М.Амиралиевни ва юртланы башчыларыны ортакъчылыкъ этивю булан республика оьлчевде чечме герекли масъалалагъа байлавлу чара юрюлдю.

Чарада районну башчысы Магьмут Амиралиев гелген къонакълагъа республика оьлчевде чечме герекли масъалаланы малим этди. Биринчи масъала – Къакъашура юрт муниципал къурулувну топуракъларындан росгвардиягъа берилген 45 гектар топуракълар.

Экинчи масъала – Агъачавулдан, Манасдан оьтеген гёчювюл топуракълар.

Уьчюнчю масъала – «Манасгент» ГУП-ну топуракълары ва хозяйствону чагъыр заводу.

Дёртюнчю масъала – Тав районлагъа берилген, бир гектары да ишлетилмейген 3 минг гектар республика агьамияты булангъы топуракълар.

Бешинчи масъала – Къурбуки юртда янгы больница къурулуп пайдаландырывгъа берилгенде, алдагъы больницаны бир корпусу бош, шо корпусну районну балансына берилсе социал объектлер, яшлар бавун ачма сюеген инвесторлар да бар.

Ёлугъувда Колледжни, Иппо­дромда атлар сакълайгъан заводну къырыйында гесек топуракълар.

Районну башчысы Магьмут Амиралиев арагъа салгъан масъалалагъа байлавлу ДР-ни Гьукуматыны председателини орунбасары Анвар Халилов биринчилей англатыв берди. Ол оьзюню сёйлевюнде Къакъашурадагъы 45 гектар топуракъланы масъаласын чечивню уьстюнде иш юрюлегенни эсгерди. – Районну башчысы Магьмут Гьюсейнович гётереген, арагъа чыгъаргъан масъалалар дестине чечме болагъан масъалалар десек тюз болмас. Амма бу масъалаланы чечме заман тарыкъ. Масъалалар закон ёлунда чечилмеге герек, шону дурус, районну пайдасына чечмек учун бизден болгъан гьаракатны этежекбиз, озокъда, закон ёлунда,- деди Анвар Халилов.

ДР-ни мал-матагь еслигини министри А.Къагьиргьажиев М.Амиралив гётереген масъалаланы ёрукълу чечивде оьзюню ойларын айтды, чечивню ёлларын гёрсетди.

- Масъала, «Манасгент» ГУП-ну топуракълары, ГУП-ларда иш юрютювню эсги къайдасы. Мен юрт хозяйство агьамияты булангъы топуракъланы ишлетивню яныман. «Манасгент» ГУП-ну топуракъларын ишлетмек учун ООО, ОАО яда оьзге къайдасын танглап иш гёрме тюше. Хозяйствону чагъыр заводуну къысматы – бу рагьат чечилеген масъала тюгюл. Мунда ишни жинаятчы яны да бар.

Ишлетилмейген республика агьамияты булангъы топуракъланы уьстюнде де закон ёлунда иш гёрме герек. Къурбукидеги эсги больницаны бинасын, Колледжни социал объектлеге айландырывну яныман. Бу масъаланы Дагъыстан республиканы савлукъ-сакълав, билим-берив министерстволары булан бирликде чечме герек. Тек биз районну башчысы Магьмут Гьюсейнович гётереген масъаланы яшавгъа чыгъарывну уьстюнде ишлежекбиз. Озокъда дестине чечилип къалагъан масъалалар тюгюл,-деди ол

Чараны ахырында сёйлеген районну башчысы М.Амиралиев гелген къонакълагъа разилигин билдирди. Чарада гётерилген масъалалар оланы гьаракаты, кёмеги булан районну халкъыны пайдасына чечилежегине инанагъанын ­англатды.