Меню
16+

Сетевое издание «Будни района»

19.06.2020 09:15 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Пагьмулу врач

Савлукъ сакълав идараланы къуллукъчулары гьакъда, айрыча врачланы гьакъында бизин яшавубузда болгъан чакъы аз эсгерилсе яхшы болса да, шо асил касбуну есилери бизге кёмекге етишмеге гече де, гюн де гьазир тура. Шо гьакъда айта туруп, къаттыгюн, июн айны 21-нде, белгиленеген медицина къуллукъчуларыны гюнюню алдында бизин лап ювукъ адамларыбызгъа бир тюгюл, нече керен де гьар тюрлю аврувлардан къутулмагъа кёмеклешген, тарыкълы гюн яннавурунда та­былгъан бажарывлу врачны гьакъында эсгермей къоймагъа болмайбыз.

Ол – Къарабудагъгент­деги центральный район больницаны инфекция бёлюгюню заведующийи Марат Къурмалиев

Халкъ арада, эл арада айтылагъангъа гёре, врачны касбусуна ес болмакъ учун адамны айрыча пагьмусу болмагъа тюше. Дурус да айтыла. Неге тюгюл, Аллагьны пурманы булан шо касбугъа ес болуп, оьзюню бютюн яшавун багъышлап дегенлей берилип, оьзюню де, заманында аямагъан кюйде, тарыкълы болгъанда ажизленип турагъан авруйгъан адамгъа етишип, ону азап чегив аврувуну себеплерин мекенли этмей туруп яллыкъ тапмай, чинкдеси, къоркъунчлу аврув оьзюне югъуп къалмагъа болагъаны гьакъда да бир де ойлашмай.

Оьрде айтылагъан сёзлер, биз ойлашагъан кюйде, Марат Къурмалиевни хасиятын, адам­лыкъ къылыкъ битимин толу кюйде ачыкъ эте. Биз айтагъан сёзлени гьакълыгъына бир де шеклик этегенлер болмажакъгъа инанаман. Неге тюгюл, шоланы бириси де къопдурув тюгюл. Янгыз ата юртлуларыбыз къарабудагъгентлилер тюгюл, савлай районну халкъы да ону 25 йылны боюнда оьзю кёп сююп танглагъан врачны касбусун ким де сукъланагъан кюйде юрютеген бек тизив врач гьисапда таныйгъандан къайры да, бек яхшы, рагьмулу юрекли адам гьисапда да биле.

Оьзюню касбу бажарывлугъун Марат март айны 27-нде бирдагъы керен де гертиледи. Ачыкълашдырып айтгъанда, савлай дюньягъа яйылып турагъан коронавирус аврув бизин районгъа етишип, шо гюн Манасгент юртдан Къарабудагъгентдеги центрдагъы район больницаны инфекция бёлюгюне коронавирус аврув къабунгъангъа шекли къатынгиши етишдирилгенде, ол бир де къайпанмады. Манасгентли шо къатынгъа эсгерилген къоркъунчлу аврув къабунгъаны мекенли этилген сонг, ол оьзюню гьаракатын бир мюгьлетге артгъа салмай къаст этип, тийишли чараланы гёрмеге башлады. Шоланы яхшылыгъындан ва Аллагьны кёмеги де булан шо къатынны гюн сайын гьалы яхшылашып, яман къоркъунчлу аврувдан къутулду. Бек къыйын гьалларда оьтген шу артдагъы къоркъунчлу аврув яйылып турагъан айланы ичинде ол шолай биревню тюгюл, онлар булан, юзлер булан адамны, оланы арасында бизин де, сав этип, яшавгъа къайтарды. Шолай четим гьаллардан ол оьзю врач болуп ишлеп турагъан йылланы ичинде нече керен де оьтген. Ону касбу бажарывлугъу, генг англавлугъу аврувлагъа языкъсынып янашагъаны огъар не къыйын гьалдан да оьтмеге ёл ачгъан.

Бизге берилген имканлыкъдан пайдаланып, Марат Къурмалиевни ва ону бары да иш ёлдашларын етишип гелеген Медицина къуллукъчусуну гюню булан къутлай туруп, сизин гьар гюнлюк жанлы гьаракатыгъыз янгыз аврувлардан инжинип турагъанлагъа тюгюл, оьзюгюзге де юрек яллыкъ булан бирге тангала да талайлы экенге инамлыкъ берсин демеге сюебиз. Сизге ва бары да дос-къардашыгъызгъа яхшы савлукъ да, кёп яхшылыкълар да ёрайбыз. Яшавугъузда яхшылкъланы арты сизин учун бир де уьзюлмесин!

Сизге уллу гьюрмет булан,Марат Къурмалиевни гьаракаты булан къоркъунчлу аврувдан къутулгъан къарабудагъгентлилени атындан: Гь. Къаппарова, Б. Гьажиева ва Т. Салимова

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

30