В.Путинни дагъыстанлылагъа этген Чакъырыву

Жыйында регионда эпидемиология гьал арагъа салынып ойлашылды.

Россия Федерацияны Президенти В.Путин Дагъыстанны ёлбашчылары, динагьлюлер, жамиятны вакиллери булангъы жыйында федерал оьлчевде Россия Федерацияны Гьукуматыны Председателини орунбасары Татьяна Голикова; РФ-ни МЧС-ини министри-Евгений Зиничев; РФ-ни савлукъ-сакълав министри Михаил Мурашко, РФ-ни оборона министри –Сергей Шойгу, РФ-ни баш санитар врачы Анна Попова ёлдашлар ортакъчылыкъ этген.

Дагъыстандан республиканы башчысы Владимир Васильев, ДР-ни Халкъ Жыйыныны Председатели Хизри Шихсайитов, республиканы муфтиси Агьмат Абдуллаев (шейх Агьмат Афанди) ортакъ­чылыкъ этген.

Владимир Путин: – Гьюрметли ишдашларым, гюн яхшы болсун! Салам!

-Бусурманлагъа лап да сыйлы Рамазан ай узатыла. Бу айда бусурманлар ораза тута, оьзге яхшы ишлени этелер. Бу йыл ораза тутма бусурманлар апрель айны 24-нде башлады, бу жума тамамланажакъ, уллу Оразабайрам башланажакъ.

Мен билемен, республикада бу сыйлы байрамгъа нечик янашагъанны, гьюрмет этегенни. Бирдагъы билемен, дин алимлер бусурманлар учун лап сыйлы Оразабайрамны гьалиги авур заманда бар халкъ жыйылып къылагъан байрам намазны межитлерде къылмай, уьйлеринде къылма, къардашларын-къурдашларын чакъырып оьтгерив адатны да заманлыкъгъа къойма чакъыралар. Эсиме геле, гьюрметли динагьлюлени чакъырывун бары халкъ эшитер ва уьйлеринде агьлюлерини уьюрлери булан байрам чараланы оьтгерир деп, мен де шогъар инанма сюемен,- деди В.Путин.

Гёрюлюп турагъан чаралагъа гёре, коронавирус инфекция аврув булангъы гьал уьлкеде ёрукълаша бара буса да, гьали де рагьатланма тез. Дагъыстанда буса коронавирус инфекция аврув булангъы гьал авур. Республикада бу аврувдан авруйгъанланы санаву артып, янгы-янгы очаглар арагъа чыгъа.

Умуми алгъанда докторланы къайратлы загьматына, гьаракатына да къарамайлы, регионну савлукъ-сакълав тармагъы башдан къыйын заманланы гечире. Коронавирус аврув себеп болуп оьлегенлени санаву артып юрюй. Гьатта медицина къуллукъчуланы арасында да оьлгенлер бар.

Адамлар айтагъан кюйде, коронавирус инфекция аврувгъа къаршы толу медицина кёмегин алма болмайгъан ерлер бар. Бириси яны, касбучулар эсгереген кюйде, регионда коронавирус инфекциягъа байлавлу гьалны авурлугъу адамлар больницалагъа геч болуп баралар, бирлери аврувдан уьйлеринде ­оьзбашына сав болма къарайлар.

Ондан къайры да, ерлерде санитар врачланы «самоизоляция» тапшурувлары нечик кютюлегенин анализ этме тарыкъ.

Дагъыстангъа коронавирус инфекция аврувну алдын алмакъ, авруйгъанланы сав этмек учун не йимик федерал кёмек тарыкъ, магъа бугюн айтыгъыз, мени булан жаваплы къуллукъчулар бар, олагъа тезликде тапшурувлар беремен,- деди В.Путин.

Республикагъа финанс, материал кадрлар булангъы кёмек этилежек.

Магъа берилген информацияда республика тест системалар, лаборатория гючлер булан четимликлер гьис этиле деп эшитемен. Бу масъаланы чалт чечме тарыкъ.

Медицина алатлар, транспорт булангъы гьал, врачланы бригадаларын къорув алатлар булан таъминлиги, медицина къуллукъчулагъа къошум гьакъ телев гьал нечик экенин эшитме сюемен.

Ондан къайры да, ерлерде ишлер нечик салынгъан. Ватандашланы яшавуну, савлугъуну гьайы, айрокъда оьмюрге баргъан адамланы «самоизоляция» режимин сакълама, узатма, предприятиелени ва медицина къурумланы къоркъунчсуз ишлевюн болдурмакъ муратда гёрюлеген чараланы да ахтаргъан.

Чараны гьасиллерин чыгъарып сёйлей туруп, В.Путин: -Коронавирус инфекция аврувну натижасында уьлкени регионларында тувулунгъан гьалдан уьстюнлю кюйде чыкъмакъ учун иш гёрежекбиз. Дагъыстандагъы гьал авур, гьалдан лайыкълы чыкъмакъ учун регион къурумлар уьлкени Гьукуматы булан бирликде мекенли алгъасавлу чаралар гёрме тарыкъ.

Такрарлайман, Дагъыстангъа бары тарыкълы кёмекни этежекбиз ва якълажакъбыз,-деди В.Путин.

Чарада республикада тувулунгъан гьалдан уьстюнлю кюйде чыкъмакъ учун федерал ведомстволагъа, коронавирус инфекция аврувну яйылывун токътатмакъ, алдын алмакъ учун мекенли тапшурувлар берилди. Республикада алгъасавлукъда 200 ери булангъы медицина центр къурма тапшурув берди.

Чарада оьзге масъалалар да гётерилди ва оланы чечивню ёллары гёз алгъа тутулду.

В.Путин Дагъыстангъа, дагъыстанлылагъа уллу сююв, гьюрмет булан янашагъанын, республиканы чечекленивюн, халкъланы яшав даражасын, социал экономика масъалаланы чечмек учун этип турагъанын, энниден сонг да этежегин англатды.