Гьалны авурлугъун англама тарыкъ

Коронавирус Китайда янгы арагъа чыкъгъанда кёбюсю пачалыкъларда бу къоркъунчлу вирусгъа онча агьамият бермей, инфекция яйылгъан пачалыкъларда ял алып, къыдырып, айланып турдулар. Гьали буса коронавирус инфекцияны очакълары янгы-янгы пачалыкъларда чыгъып геле.

Россияда коронавирус инфекциягъа къаршы дестине мекенли чаралар гёрюлгени саялы бу аврув къабунгъан адамланы санаву оьзге пачалыкълар булан тенглешдиргенде, кёп тюгюл.

Уьлкени башын тутгъанлар масъаланы къоркъунчлугъун англап, дестине адамлар кёп жыйылып оьтгерилеген чараланы, спорт ярышланы, кёп-кёп оьзге чараланы токътатгъан. Коронавирусну яйылывну алдын алмакъ муратда мекенли чаралар гёрюле. Шо чараланы бузгъанланы такъсырлав шартлар, салынагъан къодулар бир нече керенге артгъан. Адамлар бир жумалыкъ отпускаларда уьйлеринде.

Бизин республикада, шону ичинде бизин районда Дагъыстан республиканы башчысыны къарарын яшавгъа чыгъара туруп, коронавирусну алдын алывгъа байлавлу мекенли чаралар гёрюлген. Районну территориясында ашамлыкъ продукталар, дарманлар сатылагъан аптеклерден къайры идаралар, оьзге объектлер ишлемей.

Апрель айны башындан тутуп республиканы башчысыны буйругъу булан коронавирус инфекцияны яйылывуну алдын алывгъа байлавлу къабул этилген чараланы бузгъанлагъа этилеген къодулар бир нече керенге гётерилген. Адамлагъа уьйлеринде турма таклиф этиле.

Апрель айны 2-нде район администрацияны жыйынлар оьтгерилеген залында коронавирус инфекцияны яйылывуну алдын алмакъ муратда юртланы башчыларыны, юртланы имамларыны ортакъчылыкъ этивю булан чара оьтдю.

Чарада Роспотребнадзорну Каспийск шагьаргъа ва бизин районгъа къарайгъан управлениесини начальниги А.Абачараев, районну ич ишлер бёлюгюню начальниги Герей Гереев, район больницаны баш врачы Расул Гьиравов ёлдашлар ортакъчылыкъ этдилер ва чыгъып сёйледилер.

Роспотребнадзорну Каспийск шагьаргъа ва бизин районгъа къарайгъан управлениесини начальниги А.Абачараев оьзюню сёйлевюнде: — Уьлкени, республиканы башын тутгъанлар гьалны къоркъунчлугъун англап, къатты чаралар гёрегени негьакъ тюгюл. Гертилей де, гьал къувунлу. Коронавирус инфекция аврувну яйылывуну алдын алмакъ учун адамлар уьйлеринде турма тарыкъ. Адам оьзю яшайгъан ерден 100 метр ари чыкъма ярамай. Ёлларда адамланы бетинде маскалар, къолларында резин къолгъаплар болма тюше. Нечик буса да эки жума чыдама тарыкъбыз. Чакъгъа исси тюшсе, инфекция онча яйылмай. Чыдамасакъ кюй ёкъ,-деди.

- Районну ич ишлер бёлюгюню ёлбашчысы оьзюню сёйлевюнде:Районну территориясында коронавирус инфекция аврувну яйылывуну алдын алмакъ муратда ёлларда транспортну, адамланы юрюшюн болгъан чакъы токътатма къаст этежекбиз. Адамлагъа къуллукъгъа деп орамларда машин гьайдама гери урула. Низамны бузгъанлар булан полицияны къуллукъчулары къатты кюйде иш гёрежек. Мен мунда низамны бузгъанлагъа салынма болагъан къодуланы эсгерип къоркъутма сюймеймен, тек гьалны англап, болгъан чакъы уьйлеригизде турмакъны таклиф этемен,-деди.

Район больницаны баш врачы Р.Гьиравов коронавирус инфекция аврувну районда яйылывуну алдын алывда гёрюлеген чараланы малим этди. Юртлуланы уьйлеринде турма, телефонларда язылагъан ялгъан язывлагъа инанма ярамайгъанны аянлашдырды.

Чараны ахырында районну башчысы М.Амиралиев юртланы имамларын коронавирус инфекцияны алдын алывда юртланы жамиятларыны арасында тюз англатыв ишлер юрютме, республиканы башчысыны буйругъун бузмай, жуманамазны межитлеге жыйылмай, уьйлеринде этдирме чакъырды. Бу масъалагъа байлавлу чыгъып сёйлеген юртланы имамлары оьзлени пикруларын айтдылар.