Къакъашура юрт жамият булан ёлукъду

Юртлулар булангъы ёлугъувун Магьмут Амиралиев саламлашыв булан башлады.

Сёзюн узата туруп, районну башчысы М.Амиралиев булай деди:

- Мен янгы йылдан башлап юртланы активи, жамияты, тамазалары булан ёлугъувлар оьтгерип тураман. Бугюн Къакъашура юртну активи, ерли депутатлар, тамазалар булан ёлугъуп 2019-нчу йыл районда, шону ичинде сизин Къакъашура, Къакъамахи юртларда да не йимик ишлер этилген, бу йыл не йимик ишлер этме гёз алгъа тутгъанбыз шоланы сизге малим этме, сизин пикруларыгъызны билме, гележек ишибизде оланы гьисапгъа алып иш гёрме жыйылгъанбыз.

2019-нчу йылда Къакъашура юртда социал-экономика масъалаланы чече туруп, бир къадар ишлер этилди. Къакъашурадан Дёргели юртгъа барагъан ёлну 5 чакъырымдан да къолай мезгилине сылама салынды. «100» школа деген проект булан класлар онгарылды.

2020-нчы йылда Къарабудагъгент- Къакъашура ёлну къалгъан гесегине, Къакъамахи юртгъа ерли сылама салма гёз алгъа тутулгъан.

Магьмут Амиралиев сёзюн узата туруп, республикада кёп тюрлю программалар иш гёрегенин, шо программаларда ортакъчылыкъ этмек, харж алмакъ учун заманында заявкалар берме, тарыкълы кагъызланы тюз онгарып билме тарыгъын айтды.

- 2020-нчы йылда Къакъашурада хыйлы ишлер этме тарыкъбыз. Бу йыл юртну маданият Къаласына капитал ремонт этме, Къакъашура-Къакъамахи юртланы ичеген таза сув булан таъмин этмекни чаралары гёрюле.

«Местные инициативы» деген программа булан Къакъашура юрт эки проектде ортакъчылыкъ эте. Бир проект булан юртда нас-алагъожа тёкмек учун контейнерлер салма майданчаланы бетон этежекбиз. Экинчи проект булан футбол майданчаны онгарма къаст бар,-деди ол.

Магьмут Амиралиев оьзюню сёйлевюнде яшавгъа чыгъарма урунгъан проектлер алда йимик бир нече йыллар созулмайгъанны, башлангъан проект йылны ахырына битме, пайдаландырывгъа берилме тарыгъын, федерал программа булан Къакъашура, Къакъамахи юртларда яшлар бавларын къурма гёз алгъа салынгъанын эсгерди.

Магьмут Амиралиев юртлулар ДР-ни юрт хозяйство ва ашамлыкъ министерлигини янындан юрт хозяйство продукталар болдурувчулагъа этилеген кёмеклерден осал пайдаланагъанын къатты кюйде танкъыт этди.

- Гетген йыл бизин районну юрт хозяйство продукталар болдурувчулары 160 миллион манат субсидия акъча алгъан. Шо – республикада лап оьр натижа. Республикада бизден кёп субсидия акъча алгъанлар ёкъ. Мен шо да аз деп гьисап этемен. Гьукумат топуракъда доланагъанлагъа, юзюм, емиш бав этегенлеге, гьайван, мал сакълайгъанлагъа кёмек эте болгъан сонг, неге биз шо имканлыкъланы толу къоллама къарамайбыз, гьаракат этмейбиз?! — деди ол.

Ёлугъувда “юртну ичиндеги орамлар бузукъ, къарав ёкъ” деген сорав арагъа чыкъгъанда, М.Амиралиев налогланы, айрокъда транспорт налогну гьакъында маълумат берди.

-Юртда мал-матагь, топуракъ налогланы жыйыв яман тюгюл. Транспорт налогну жыйыв акъсакълай. Алда биз жыйылгъан транспорт налог къайда гетгенни билмей эдик. Гьали республиканы башчысы В.Васильев район жыйгъан транспорт налогну районгъа бере, мен де къайсы юрт нечакъы транспорт налог жыйгъан коэффициент де къошуп шо юртгъа бережекмен. Шо харжлар булан ­юртну башчысы орамланы онгарма, оьзге ишлени кютме болалар.

Ёлугъувда юртну активи, тамазалар районну башчысыны алдында кёп тюрлю соравланы гётердилер. Бирлерине дестине жаваплар къайтарылды, оьзгелери, яшавгъа чыгъармакъ учун, гьисапгъа алынды.