Игитлерибизни унутмайыкъ!

Чарада Уллу Уьстюнлюкню 75 йыллыгъын лайыкълы къаршылай туруп, биринчилей 1941-1945-нчи йылларда немис-фашист елевчюлеге къаршы къыргъын давларда ватаныбызны харлысызлыгъы учун дав майданларда жанларын къурбан этген воинлерибизни эсделигине салынгъан памятниклени, обелисклени гьалы ва оланы шатлыкълар башлангъынча онгарыв, безендирив эди.

Бу масъалагъа байлавлу районну башчысыны биринчи орунбасары Агьмат Гьажиев гьисап берди.

Бизин районлулар дав майданларда душман булан бетге-бет ябушуп игитликлер, къоччакълыкълар гёрсетгенин эсгерди. Агьмат Гьажиев оьзюню сёзюн узата туруп:

- Уьстюнлюкню гюню совет халкъгъа нече де багьа токътагъан. Бизин эркинлигибиз, парахат яшавубуз саялы 27 миллион адамыбыз дав майданларда оьлген, белгисиз тас болгъанлар. Оланы арасында бизин районлулар да аз тюгюл. Биз, оьсюп гелеген яш наслу, оланы атларын, олар дав майданларда гёрсетген игитликлерин, къоччакълыкъларын бир заманда да унутма тарыкъ тюгюлбюз,-деди ол.

Олай да, сёзюн давам эте туруп, А.Гьажиев:

- Ана Ватаныбызны эркинлиги, харлысызлыгъы учун ябушгъан игитлерибизни эсделигине районну гьар юртунда эсделиклер салынгъан.

Оларда давдан къайтмай къалгъан, давда ортакъчылыкъ этген воинлерибизни атлары алтын варакъ булан язылгъан.

Къарабудагъгентде У.Буй­накс­кийни атындагъы ял алагъан бавда 3 эсделик бар.

Бири – Уллу Ватан давну ортакъчыларыны, бириси – афгъан агьвалатланы, биревюсю парахат девюрде халкъын, ватанын якълай туруп жанларын къурбан этген полицияны къуллукъчуларыны эсделигине салынгъан.

Бугюн биз Уллу Уьстюнлюкню 75 йыллыгъын лайыкъ­лы къаршылама гьа­зирлик гёре туруп, юртла­рыбызда бар эсделиклени, олардагъы язывланы, эсделиклени айлана ягъын онгарма, ёрукъгъа гелтирме тарыкъбыз. Россия Федерацияны 1993-нчю йылны январ айыны 14-нде къабул этген 4292-1 номерли законунда айтылагъан кюйде, ерлерде бар эсделиклени ерли муниципал къурулувлар оьз харжы булан ёрукъгъа гелтирме, онгарма тарыкъ. Тек, муниципал къурулувланы эсделик­лени ёрукълу сакъламакъ учун харжы етишмей, районну янындан кёмеклер болса яхшы болур эди,-деди.

А.Гьажиев оьзюню сёйлевюнде районну юртларында бар эсделиклени умуми гьалы яман тюгюлюн эсгерди. Уллубийавул юртдагъы эсделиклени онгармакъ учун бираз къолай чыгъышлар тарыкъ. Къалгъан эсделиклени аз чыгъышлар булан да онгарма болажагъын айтды.

Сонг да, А.Гьажиев районда республика, район газетге язылыв кампанияны гьасиллерин чыгъарып сёйледи. Ону сёйлевюнде ачыкъ болгъаны йимик, язылыв кампанияны гьасиллери рази къалдырмай.

Юртланы башчылары, къурумланы ёлбашчылары, школаланы директорлары газетлеге, журналлагъа язылывгъа сувукъ-салкъын янашгъанын танкъыт этди.

Чараны ахырында гьасил чыгъарып сёйлей туруп, районну башчысы М.Ами­ралиев:

-Юртланы башчыларына ватанын якълай туруп жанын къурбан этген воинлерибизни эсделиклерине жаваплы янашма, ватандашланы, ­оьсюп гелеген яш наслуда патриот ругьун гётермек учун игитлерибизни къоччакъ ишлерин англата, ёлугъувларда, чараларда эсгере турма тарыгъын англатды. Шо – бизин уьлкени тархы. Оьсюп гелеген яш наслу игитлерибизни, тылда Уллу Уьстюнлюк учун гечесин-гюнюн бир этип, авлакъларда загьмат тёкгенлени атлары да унутулма тюшмей. Олар оьсюп гелеген яш наслуну патриот ругьда тарбиялавда уьлгю болма тарыкъ,- деди районну башчысы М.Амиралиев.

Чараны тамамлай туруп, районну башчысы М.Ами­ралиев юртланы башчыларына, къурумланы ёлбашчыларына район газетге 100 процент язылывну болдурмакъ учун къатты тапшурув берди. Район газет – районгъа тарыкъ.