Халкъына къуллукъ этген

- Абдулкъасум Пайзуллаев оьзюне 15 йыл болагъандан берли ишлемеге башлагъан. Уллу Ватан дав башлангъынча, ол школада муаллим болуп ишлеген. Дав башлангъанда, ол давгъа гетген. Къырым бойларда яра тийген сонг уьйге къайтгъан. Ол бек асил адам болгъан, ону хабарларына тынг­лагъан адам тынглап турма сюе болгъан. Абдулкъасум агъавну белгили устазыбыз Абусупиян Акаев охутгъан. А.Акаевни гьакъында ол кёп хабарлар язгъан. Алимни китапларындагъы шиъруланы ва назмуланы кёбюсюн гёнгюнден биле болгъан. Абдулкъасум агъав оьзю де иманны-динни тазалыгъын суратлайгъан шиърулар, пай­далы насигьатлар, арив назмулар язгъан. Ол – бизин топуракъда тувгъан, тек биревлени яманлыгъындан ватанын къоюп гетме борчлу болгъан, белгисиз ерлерде къалмагъа тюшген устазыбыз Абусупиян Акаевни сесин, ругьун мундагъылагъа етишдирмеге бажаргъанланы бириси. Ону назмулары ва шиърулары охувчулар учун бек пайдалы экенге инанабыз…-дей олар.

Сонг сёз берилген Къарабудагъгент районну яшёр­юмлерини насигьатчысы, му­аллими, район ТОКС отрядны ёлбашчысы Умусалимат Бутаева Абдулкъасум Пай­зуллаевни гьакъында жыйылгъанлагъа бек маъналы лакъыр этди.

- А.Пайзуллаев 1907-нчи йылда Къарабудагъгентде­ тувгъан. Ол гиччилей етим къалгъан. Эгечиси Минаханым ону билимлеге гьасиретлигин эс этип, оху­магъа салгъан. Оьрде­ эсгерилгени йимик, А.Пай­зуллаев Абусупиян Акаевни алдында охугъан. Ол йыл ярым охуп, юртуна яшлагъа билим бермеге гелген. Давдан къайтып яралары сав болгъан сонг, ол райОНО-ну инспектору ва муаллим болуп ишлеген. Муаллими А.Акаевни китапларын да гётерип ол хоншу юртлагъа да кёп юрюген. Савунда ол муаллими гьакъда кёп хабарлагъан, ону назмуларын, шиъруларын гёнгюнден оху­гъан, Абусупиян муаллими бары да илмулардан англавлу ва билимли адам болгъанын кёп эсгерген.

Абдулкъасум агъав уллу шаир болмаса да, оьзюню ата юртуна, элине сюювюн кёп арив тенглешдиривлени, эпитетлени къоллап гёрсетме бажаргъан. Оьзюню ­оьсдюрген, ишге уьйретген ата юртун ол булай суратлай: «… Турна гёзден де таза салкъын сувлары, булакълары, сююнчлери шав­лагъа шавла къоша, ­оьмюрлери «Бекенез» йимик толуп агъа, умутлары уллу, билеклеринде къуват бар, елкенли гемеге ошай». Оьзюню шиъруларында Абдулкъасум агъав яшланы тюз тарбиялавгъа айрыча агьамият бере. Ата-ананы яшлагъа дин ёлунда тарбия берме, адилли, илмулу этип тарбиялама чакъыра.

Ону ватангъа жаны авруй, элни талавурчулары оьтесиз талчыкъдыра. Гьар назмусунда инсанланы дос­лукъгъа, татывлукъгъа, ата-анагъа абур этмеге чакъыра. Абдулкъасум агъав ананы абурун артдырма, аяма герегин айта, къатын-къызлагъа агьлюсюне амин болмагъа, яшланы тарбиялавгъа оьз­лени толу кюйде бермеге тарыгъын англата…

Абдулкъасум агъавну умут­­лары халкъы учун ях­шы­­лыкълагъа, оланы абуру, илмусу артмакъ, гележек наслу гьалигинден артыкъ болуп, оьтген девюрге тюз ба­гьа берип, абургъа тийишлилени абурлап яшамакъ эди.

Ол язгъан шиъруланы ва назмуланы яш наслугъа етишдирмек – бизин борчубуз. Олар гьалиги яшланы тарбиясы учун да пайдалы болур деп инанаман,-дей У.Бутаева.

Сонг Къарабудагъгент гим­­­назияны охувчулары А.Пай­­­­­­зуллаевни шиъруларын гёнгюнден охуду.

Сёз берилген район социал сиясат управлениени ёлбашчысы Гюлжанат Темирова шулай ёлугъувлар яшлар учун бек пайдалы экенни эсгере туруп, район китап­хананы къуллукъчуларына ёлугъувланы оьтгерегени саялы разилигин билдирди.

Олай да, районну ветеранларыны советини председатели Гьажи Гьажиев А.Пайзуллаев булан иш уьстде ва къардаш аралыкъларда болгъан ёлугъувланы эсге алды ва хабарлады. Атасын эсге ала туруп сёйлеген ону къызы Райсанат бажив атасыны гьакъында хабарлады. Ол юртну яшавун билме, масъалаларын чечме, юртлуларына кёмек этмеге гьазир тургъанын, яшланы тарбиясына ва билимине бек тергевлю болгъанын эсгерди. Сёйлевюн тамамлай туруп, оьзюню атасын эсге алып, булай арив ёлугъув оьтгергенлеге баракалла билдирди.

Адатлангъан маданият Центрны йыравлары Асгендер Исрапилов ва Абдулазим Найипханов давну ортакъчысы болгъан Абдулкъасум Пайзуллаевни эсделигине багъышлап дав темагъа багъышлангъан йырланы йырлады.

Ёлугъув эсделикге суратлар чыгъарыв булан тамамланды.