Байрамгъа онгарылывлар

Генгешни ачгъан ва юрютген районну башчысы Магьмут Амиралиев янгы йылгъа багъышлангъан чараланы оьт­герив гьакъда баянлыкълар бермеге Къарабудагъгент ОМВД-ни полициясыны ёлбашчысы Руслан Халдузовгъа сёз берди.

Р.Халдузов оьзюню сёйлевюнде байрам чараланы оьтгеривде къуршалажакъ полицияны къуллукъчуларыны ва хас техниканы гьакъында айтды. Демек, полицияны 116 къуллукъчусу ва 18 хас техника аманлыкъны болдуражакъ. Шоланы 80-и Къарабудагъгент юртну ичинде болажакълыгъын англатды Р. Халдузов.

Олай да, ол оьзюню сёзюнде адамланы байрамланы вакътисинде сакъ турмагъа ва аманлыкъны болдурмагъа чакъырды.

Ондан сонг трибунагъа район администрацияны социал сиясат управлениени ёлбашчысы Гюлжанат Темировагъа сёз тапшурулду. Ол оьзюню сёйлевюнде 30-нчу декабрден январ айны 10-у болгъунча Къарабудагъгент юртда оьтгерилежек чараланы гьакъында мекенли кюйде маълуматлар берди.

Айтагъаным, Гьамзатовну атындагъы ял алагъан паркда ёлка безендирилипсалынгъан. Шо байрам чара бугюн, 30-нчу декабрде, 16 сагьатда 00 минутда оьтгерилежек. Шонда янгы йылгъа багъышлангъан шатлыкълар ва чыгъышлар болажакъ.

Январ айны 6-нда пост ГАИ-ни янында бютюн район юрт хозяйство ярмакю оьтгерилежек. Ярмакюде районну ичиндеги юрт хозяйство малболдурувчулар ва КФХ-лер оьзлени продукциясын алып гележек.

Олай да, Г. Темирова оьзюню сёйлевюнде эсгерген кюйде, байрам чараланы оьтгерегенде Роспотребнадзорну талапларын ва таклифлерин яшавгъа чыгъара туруп, юрютмеге тарыкълыгъын ташдырды.

Оланы сёйлевлеринден сонг, районну гьакимбашы Магьмут Амиралиев оьзюню пикруларын ва ойларын айтып сёйледи.

Масала, М. Амиралиев Къарабудагъгентде оьтгерилежек байрам чаралагъа ортакъчылыкъ этмеге бары да халкъны чакъырды. Шо чарада яшлар учун айрыча чыгъышлар ва оьзге шатлы номерлер гёрсетмеге таклиф этди.

Олай да, ол 6-нчы январда оьтгерилежек ярмакюде багьалар базардан эсе учуз болмагъа тарыкълыгъын ачыкъ этди. Байрамланы вакътисинде жаваплы ёлдашлар гьар заман байлавлукъда болмагъа гереклигин англатды. Районну башчысы М. Амиралиев юртланы санитар гьалы гьакъда да айтды.

Демек, байрам гюнлени вакътисинде бизин райондан таба кёп халкъ о якъгъа, бу якъгъа айланажакъ. Олар бизин тазалыгъыбызгъа оьзлени къыйматын бережек. Шо саялы да, санитар гьалны гьар даим яхшы сакъламагъа тарыкъ.

Оьзюню сёйлевюню ахырында районну башчысы Магьмут Амиралиев оьтюп барагъан йылны гьасиллерин чыгъаргъан сонг, гелеген йылда къатты савлукъ, насип, берекет ва уьстюнлюлер ёрады.