Ватандашланы аманлыгъын болдура

20-нчы декабр – ФСБ-ни къуллукъчусуну гюнюн белгиленмеклиги учун айырылгъаныны себеби де, шо гюн 1917-нчи йылда Совнарком ВЧК (Бютюнроссия чрезвычайный комиссия) къурулгъан гюн. Сонггъу йыллар ВЧК бир нече керенлер алышынгъан. 1922-нчи йыл – ГПУ (Пачалыкъ сиясат управление), сонг ОГПУ болгъан. 1934-нчю йыл НКВД къурулгъан. ОГПУ-ну аты алышынып ГУГБ (Пачалыкъ аманлыкъны Баш управлениеси), 1943-нчю йыл НКВД-ден НКГБ айырылгъан, арадан 3 йыл оьтюп, (МГБ) министерствогъа айлангъан.

1954-нчю йыл МГБ-ден бары бёлюклер тайдырылгъан, шолардан айрыча КГБ къурулгъан, 1991-нчи йыл КГБ де тайдырылгъан.

1993-нчю йыл ФСК (Контрразведканы федерал къуллугъу) къурулгъан, 2 йыл оьтюп, янгыдан ФСБ болгъан.

ФСБ-ни къуллукъчусуну гюнюню алдында 2010-нчу йылда террорчуланы къолундан вагьши кюйде оьлюп гетген ФСБ-ни Къарабудагъгент райондагъы бёлюгюню ёлбашчысы Гьажиев Магьамматсайит Гьажиевични гьакъында айтмайлы ва язмайлы болмайсан.

2010-нчу йыл ноябр айны 21-нде эртен 9 сагьат 45 минутда Къарабудагъгентни баш орамларыны биринде, демек, Буйнакскийни ва Дахадаевни атындагъы орамлар ёлугъагъан еринде ФСБ-ни подполковниги М.Гьажиев оьзюню иш уьстде къуллукъ этеген «Нива» машини булан УФСБ-ни бинасыны къапуларыны алдына етишгенде, белгисиз адам арекден таба (дистанционно) алдын ерли машинге салынгъан бом­баны атылтгъан. Магьамматсайит Гьажиевни авур яралар булан тезликде больницагъа етишдирген, тек врачлар нечакъы гьаракат этсе де, огъар кёмек этип болмагъан.

Яшайым ва ишлейим деп турагъан жап-жагьил улан чакъсыз яшавдан гетип, ону уьч яшы етим къала. Шо заман М.Гьажиев ФСБ-ни ёлбашчысы болуп ишлеме башлагъанлы 1 йыллагъа ювукъ бола эди.

ФСБ-ни къуллукъчуларыны оператив бёлюгю шо заман билдиргенге гёре, теракт губденли бандит бёлюкню уьюрлерини ёлбашчылыгъы булан оьтгерилген. Шо бёлюкню ёлбашчылары Ибрагьимхалил Давутов ва ону уланы Магьамматшапи болгъан. Эсгерилген бандитлени бёлюгю ихтияр якълав къурумланы къуллукъчуларына, олай да, оьзлеге къаршылыкъ билдиреген оьзгелеге къаршы кёп терактлар оьтгерген. 2010-нчу йылны август айы болгъунча шо бёлюкге Магьамматали Вагьапов ёлбашчы­лыкъ этген. Гуниб юртда оьтгерилген хас операцияны вакътисинде законсуз савутлангъан бандит бёлюкню башчысы ёкъ этилинген сонг, бёлюкню башчысы Ибрагьим Давутов болгъан.

ФСБ-ни ёлбашчысы болуп ишлейгени узакъ болмай эди буса да, М.Гьажиев шо къурумда ёлбашчы болуп иш башлангъынча да оьзюню яхшы якъдан танытма, ишине намуслу янашма гьаракат этген. Террорчулукъгъа къаршы ябушувда бажарывлу ишин аян этген жагьил улан, ФСБ-ни подполковниги М.Гьажиев 40 йыл чагъында бандитлени къолундан вагьши кюйде оьлюп гетди.

Арадан 10 йыл гетген буса да, Магьамматса­йит Гьажиев юртлуланы, иш ёлдашларыны бугюнде де эсинде ва даимге де къалажакъ!