Оператив штабны генгеши

Оьзюню сёйлевюнде районну башчысы Магьмут Амиралиев артдагъы жумаланы ичинде районда коронавирус инфекциядан авруйгъанланы санаву гётерилгенин, больницада ятгъанланы санаву 40-дан оьтгенин эсгерди. Тек шогъар гёре районда бары тарыкълы чаралар юрюлюп турагъанны, гьар гюн­люк гьал тындырыкълы тергевню тюбюнде экенни ташдырды.

Генгешни барышында шо гюнню повесткасына гёре ону ортакъчылары масъалагъа байлавлу оьзлени ойларын, пикруларын арагъа салып ойлашды ва шогъар гёре нечик чаралар гёрмеге герегин токъташдырды:

-Декабр айны 9-ндан башлап районда тойлар оьтгерилеген залланы, къальян тартагъан ерлени ишин токътатмакъ;

-межитлеге кёп адам бирче жыйылывуну алдын алмакъ;

-оьтгерилеген дин чараланы онлайн-режимде оьтгермек, интернетден, телевидениеден халкъгъа гёрсетмек;

-межитлерде, намаз жувунагъан ерлерде 10-дан артыкъ адам жыйылывну токътатмакъ;

-халкъны къуллукъларын кютеген идараланы ёлбашчыларына ( сатыв-алыв, общепит объектлер, коммунал-яшавлукъ объектлер, МФЦ, банклар ва башгъалары) ишни барышында заманлыкъгъа ишни токътатып, иш ерлерде дезинфекция чаралар оьтгермеге, демек, «санитар сагьатлар» этмеге тарыкъ;

-Янгы йылны алдында адамланы жыйылыву булан тюрлю шат­лыкълар, чаралар оьтгермекни алдын алмакъ, олай да, гьар тюрлю ял алагъан ерлеге, базалагъа кёп халкъ жыйылмакъны гери урмакъ;

-2020-нчы йылны декабр айыны 25-нден 2021-нчи йылны январ айыны 10-у болгъунча орта билим береген ва школа чагъына етишмеген яшлар юрюйген муниципал идараланы бегитмек;

-оларда Янгы йылны байрамына багъышлангъан чараланы оьтгеривню алдын алмакъ;

-районда лаборатория ахтарывланы 200-ден аз болмайгъан кюйде оьтгермек;

-коронавирус инфекцияны заманында, демек, эпидемиология гьал ёрукълашгъынча, 65 йылдан оьтген ва дагъы да уллу адамлар, олай да гьар тюрлю узакълангъан аврувлары булангъылар оьзлени башгъалардан арек сакълавуна, къыргъа чыкъмай, уьйде турушуна тергев болдурмакъ. Олай да, ватандашлар жамият транспортда, адамлар кёп жыйылагъан ерлерде маскалар тагъып ва къолгъаплар гийип айланывуна тергев этмек;

-маска режимни бузагъанланы такъсырламакъ…

Оьтгерилген оператив штабны генгешинде районда COVID-19 коронавирус аврувну яйылывуну алдын алмакъ учун районну башчысы къабул этген къарарны толу кюйде газетибизни бешинчи бетинде орус тилде охумагъа боласыз.