Меню
16+

Сетевое издание «Будни района»

06.11.2020 11:51 Пятница
Категории (2):
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Янгы чакъырыв

Автор: Багьавутдин Самадов

Ноябр айны 3-нде район администрацияны жыйынлар оьтгерилеген уллу залында «Къарабудагъгент район» муниципал районну депутатларыны Жыйыныны 4-нчю чакъырывуну 1-нчи къурум сессиясы ­оьтгерилди. Оьтгерилген сессияны барышында районну Жыйыныны депутатлары булан бирче «Къарабудагъгент район» муниципал район башчысы Магьмут Амиралиев де оьзюню ортакъчылыгъын болдурду.

Сессияны район Жыйыныны ­оьмюрге лап уллу депутаты Гьасан Гьасанов ачды ва район Жыйыныны янгы ёлбашчысы сайлангъынча юрютдю. Гь.Гьасанов сессияны гюнлюк низамын депутатлагъа ачыкъ этген сонг, Къарабудагъгент районну территориал сайлав комиссиясыны ёлбашчысы М.Алпанаевге сёзню тапшурду.

Ол оьзюню сёйлевюнде 11-13-нчю сентябрде районда оьтгерилген сайлавланы гьакъында маълуматлар берди. Олай да, ол район Жыйынына юрт жыйынлардан 51 депутат гёрсетилгенин аян этди.

Гь.Гьасанов район Жыйыныны депутатларыны регламентини гьакъында баянлыкълар бермеге ва район Жыйыныны структурасыны гьакъында англатмагъа район Жыйыныны депутаты М.Вагьаповну трибунагъа чакъырды.

М.Вагьапов оьзюню сёйлевюнде район Жыйыныны структурасы ва аппараты гьакъында тындырыкълы кюйде баянлыкълар берген сонг, Къарабудагъгент ТИК-ни ёлбашчысы М.Алпанаев район Жыйынына депутатлар болуп вакил этилип гёрсетилген депутатлагъа шагьатнамалар тапшурду.

Сонг, районну башчысы Магьмут Амиралиев район Жыйыныны 4-нчю чакъырывуна район Жыйыныны ёлбашчысыны къуллугъуна Адил Салаватовну таклиф этди. Шоллукъда, «Къарабудагъгент район» муниципал районну Жыйыныны 4-нчю чакъырывуна ёлбашчы этилип Адил Салаватов сайланды. Район Жыйыныны ёлбашчысыны орунбасарларыны къуллугъуна М.Вагьапов, М.Агаев ва Б.Насрутдинов сайландылар.

Янгы къурулгъан район Жыйыныны аппаратыны ёлбашчысы этилип Б.Сахаватов гёрсетилди. Къарабудагъгент районну тергев-гьисап палатасыны ёлбашчысы этилип К.Абусайитов, аудиторну къуллугъуна Ж.Жамалутдинов белгиленди.­

Сессияны барышында район Жыйыныны ёлбашчысыны орунбасары М.Вагьапов район Жыйыныны президиумуну ва даимлик комиссияларыны гьакъында маълуматлар берди.

Район администрацияны финанс ишлеге къарайгъан управлениени ёлбашчысы А.Шагьманаев «Къарабудагъгент район» муниципал районну 2020-нчы ва планлашдырылгъан 2021-2022-нчи йыллагъа бюджетине алмашынывлар этмеге депутатлагъа таклиф этди.

Район Жыйыныны 4-нчю чакъырывуну 1-нчи къурум сессиясыны ахырында район Жыйынына ёлбашчы болуп сайлангъан Адил Салаватов, инамлыкъ билдирген оьзюню иш ёлдашларына ва районну башчысы Магьмут Амиралиевге баракалласын билдирген сонг, районну насипли ва ярыкъ гележеги учун гьалал кюйде чалышажагъын англатды.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

12