Чара оьтгерилди

Алдагъы гюн, октябр айны 30-нда, Къарабудагъгент районну школа-интернатында «Единство народов Дагестана против экстремизма и терроризма» деген Халкъланы бирлигини гюнюне багъышлангъан чара оьтгерилди.

Шо гюн школа-интернатны коллективини оьтгерилеген чарагъа бек арив гьазирлиги бар эди.

Залны ичи плакатлар, шарлар булан безенип жыйылгъанланы гёзюн тарта эди. Оьзюню «Сыны Дагестана» деген йыры булан Албина Къазакъмурзаева чараны ачды.

Оьтгерилген чарада шо гюн Къарабудагъгент районну башчысыны орунбасары Магьамматгьанипа Зугьумов, районну тамазаларыны Советини председатели Абдулгьамит Мамагишиев, районну прокуроруну кёмекчиси Денис Семедов, жамият советни председатели Имамутдин Къаранаев, архнадзорну ёлбашчысы Имангьюусен Шихаев ва школа-интернатны ёлбашчысы Гуляйбат Абулашева ортакъчылыкъ этди.

Чараны юрютювчюлери бизин уьлкебиз ва республикабыз 20 йылны узагъында террористлер булан ябушуп алдын болгъаны гьакъда ачыкъ этип хабарлады.

Шо йылланы ичинде полицияны къоччакъ къуллукъчулары бизин районну халкъы парахат яшасын учун оьзлени жанын аямай террористлер булан ябушгъанны ачыкъ этди.

Чарада чыгъып сёйлеген къонакълар Абдулгьамит Мамагишиев, Денис Семедов ва Имамутдин Къаранаев школаны яшларына бизин республикабыз ва уьлкебиз учун жанын бергенлени унутмагъа ярамайгъанны гьакъында айтды.

Бары да яшлагъа шолай къыйынлыкъланы гёрмей яшамакъны ёрады.

Школа-интернатны охувчу яшлары шо гюн гелген къонакълагъа оьзлени бийивлерин гёрсетди, къурдашлыкъгъа ва къардашлыкъгъа багъышлангъан шиърулар охуду.

Школаны охувчулары Б.Ба­гьавутдинов ва Э.Къазувов «Пусть всегда будет солнце» деген йырны йырлады.

Чараны ахырында школаны директору Гуляйбат Абулашева бары да гелген къонакълагъа баракалла билдирди.